बर्लिन : जर्मनीत (Germany) बनावट कोविड-19 लसीचं प्रमाणपत्र (Fake Covid Vaccine Certificate) लीक होण्याच्या भीतीनं एका व्यक्तीनं आपल्या संपूर्ण कुटुंबाची हत्या केली आणि नंतर स्वत: आत्महत्या केलीय. काही दिवसांपूर्वी या व्यक्तीनं आपल्या पत्नीचं बनावट लसीकरण प्रमाणपत्र बनवलं होतं. हे प्रकरण उघडकीस आल्यावर, कुटुंबाला वेगळं केलं जाईल, अशी भीती त्यांना होती.

डेली मेलच्या वृत्तानुसार, ही घटना बर्लिनच्या (Berlin) दक्षिणेकडील कोनिग्स वुस्टरहॉसेनमधील (Königs Wusterhausen) आहे. पोलिसांना (Police) शनिवारी शेजाऱ्यांकडून या घटनेची माहिती मिळाली. त्यानंतर घरातून पती-पत्नी (दोघांचं वय 40) आणि तीन मुलींचा मृतदेह पोलिसांना सापडला. मुलींचं वय 10, 8 आणि 3 वर्षे असल्याचं सांगण्यात येतंय. घटनास्थळावरून पोलिसांना एक लांब पानाची चिठ्ठीही सापडलीय. यामध्ये डेव्हिड आर नावाच्या व्यक्तीनं लिहिलंय, मी माझी पत्नी लिंडासाठी बनावट लसीकरण प्रमाणपत्र बनवलं होतं, असं नमूद आहे.

फिर्यादी गर्नोट बॅंटलोन यांनी डीपीए या वृत्तसंस्थेला सांगितलं की, या जोडप्याला अटक केली जाईल आणि त्यांच्या मुली लेनी, जेनी आणि रुबी यांना त्यांच्यापासून दूर केलं जाईल, अशी भीती त्यांना वाटत होती. दोन आठवड्यांपूर्वी जर्मनीमध्ये एक नवीन कायदा करण्यात आलाय. या अंतर्गत कोविड लसीचं बनावट प्रमाणपत्र बनवणं गुन्हा असून असं आढल्यास एक वर्ष कारावास आणि दंड अशी शिक्षा आहे. या व्यक्तीनं आधी पत्नी आणि मुलींवर गोळ्या झाडल्या. नंतर स्वत:वर गोळी झाडल्याचा संशय तपासकर्त्यांना आहे. पोलिसांना घरातून एक बंदूकही सापडलीय. मात्र, या बंदुकीतून गोळी झाडण्यात आली की नाही, हे अद्याप स्पष्ट झालेलं नाही.