नवी दिल्ली : श्रीलंकेत निर्माण झालेल्या मोठ्या आर्थिक पेचप्रसंगात भारतानं आत्तापर्यंत मोठी मदत केली आहे. आता भारतानं इंधन पुरवण्याचाही निर्णय घेतला आहे. त्यानुसार, भारताकडून श्रीलंकेला सुमारे २ लाखांहून अधिक मेट्रिक टन इंधनाचा पुरवठा केला जाणार आहे. श्रीलंकेतील भारतीय उच्चायुक्तांनी आपल्या ट्विटर हँडलवरुन याची घोषणा केली आहे.

भारताकडून गुरुवारी श्रीलंकेला ६५,००० मेट्रिक टन युरियाचा पुरवठा करण्यात आला होता. दरम्यान, श्रीलंकेचे भारतातील उच्चायुक्त मिलिंडा मोरागोडा यांनी खतं विभागाचे सचिव राजेशकुमार चतुर्वेदी यांच्याशी बैठक घेऊन चर्चा केली होती. त्यानंतर खतं पुरवण्याचा निर्णय घेण्यात आला होता.

श्रीलंकेची अर्थव्यवस्था ही प्रामुख्यानं पर्यटनावर आधारित आहे. पण इतर सर्व गोष्टींसाठी त्यांना आयातीवर अवलंबून रहावं लागतं. सध्या श्रीलंकेवर मोठं आर्थिक संकट ओढवलं असून परदेशी गंगाजळी संपली आहे. त्यामुळं त्यांना खाद्य पदार्थांपासून इंधन आणि इतर सेवांसाठी इतर देशांवर अवलंबून रहावं लागत आहे. यापार्श्वभूमीवर शेजारील या देशाला हवी ती मदत देण्याची घोषणा भारतानं केली आहे.

भारतानं आजवर श्रीलंकेला तांदूळाची खेप पाठवली आहे. तसेच १८.५ हजार कोटी रुपयांची मदतही केली आहे. श्रीलंकेच्या पायाभूत सुविधा योजनांमध्येही गुंतवणूक करण्यात येणार आहे.