तेल अविव- इस्त्रायलवर हमास दहशतवादी संघटनेने हल्ला केला आहे. परिस्थिती संघर्षमय झाली असून कधीही युद्धाची घोषणा होऊ शकते. या पाश्वभूमीवर इस्त्रायलमधील भारतीय नागरिकांना मार्गदर्शक सूचना जारी करण्यात आल्या आहेत. स्थानिक प्रशासनाच्या सूचनांच्या पालक करण्याचे आवाहन सरकारकडून करण्यात आले आहे. (India issues advisory for its nationals in Israel amid Hamas terrorists' attack on Israel)

इस्त्रायलवर शनिवारी सकाळी चार वाजल्यापासून हमास दहशतवादी संघटना हल्ले करत आहे. सकाळच्या सुमारास दोन तासांमध्ये ५ हजार रॉकेट हल्ले झाल्याचं बोललं जातं. अनेक दहशतवादी इस्त्रायलमध्ये घुसले आहेत. त्यामुळे संघर्षाची स्थिती निर्माण झालीये. यापार्श्वभूमीवर भारत सरकारकडून तेथील आपल्या नागरिकांना सतर्क करण्यात आले आहे.

विनाकारण कुठेही बाहेर पडून नका, ज्या ठिकाणी सुरक्षित स्थळे आहेत त्याच ठिकाणी थांबा. तसेच काही मदतीसाठी अधिकृत वेबसाईटला भेट द्या, असं भारताकडून सांगण्यात आलं आहे. हमासच्या हल्ल्यामुळे आतापर्यंत चार इस्त्रायली नागरिक मृत्यूमुखी पडल्याची माहिती आहे. तसेच अनेकजण जखमी झाले आहेत. त्यामुळे भारतीयांना खबरदारी घेण्याचे आवाहन सरकारकडून करण्यात आले आहे.

गाझा पट्टीतून इस्त्रायलच्या दिशेने रॉकेट हल्ले करण्यात आले आहेत. गाझा पट्टीमध्ये हमास दहशतवादी संघटनेचे राज्य आहे. गेल्या अनेक वर्षांपासून हमास इस्त्रायल लष्कराशी लढत आहे. दोघांमध्ये अनेकदा संघर्ष झाला आहे. यावेळी हमासने गेल्या काही वर्षातील सर्वात मोठा हल्ला केल्याचं बोललं जातंय. इस्त्रायल युद्धाची तयारी करत आहे. (Latest Marathi News)