वॉशिंग्टन : भारतात कोरोना विषाणूचा संसर्ग झालेल्या व्यक्तींची संख्या वेगाने वाढली असल्याने सरकारने लसीकरण मोहिमेला वेग आणला आहे. त्याचाच परिणाम म्हणून भारताकडून इतर देशांना होणाऱ्या लसपुरवठ्यात घट होण्याचा अंदाज ‘ग्लोबल अलायन्स फॉर व्हॅक्सीन अँड इम्युनायझेनश’ने (गॅवी) व्यक्त केला आहे. संयुक्त राष्ट्र, जागतिक आरोग्य संघटना आणि ‘गॅवी’ संस्थेमार्फत जगभरातील लसपुरवठ्याचे नियोजन केले जात आहे.
भारत हा जगातील सर्वांत मोठा लस उत्पादक देश आहे. तसेच, विकसनशील देशांना लसपुरवठा करण्यातही भारत अव्वल आहे. भारतात रुग्णसंख्येत वेगाने वाढ झाल्याने सरकार साहजिकच आपल्या नागरिकांना अधिक प्राधान्य देण्याची शक्यता आहे. त्यामुळे भारताला देशांतर्गत वापरासाठी अधिक लशींची आवश्यकता पडणार असून त्याचा परिणाम जागतिक लसपुरवठ्यावर होऊ शकतो, असे ‘गॅवी’चे मुख्य कार्यकारी अधिकारी सेठ बर्कले यांनी एका मुलाखतीदरम्यान सांगितले.
‘जगभरातील एकूण स्थिती पाहता मार्च आणि एप्रिल या महिन्यांत भारताकडून आम्हाला नऊ कोटी लशींचे डोस मिळण्याची अपेक्षा आहे. मात्र, भारतातील रुग्णसंख्येतील वाढ पाहता अपेक्षेपेक्षा कितीतरी कमी डोस मिळतील. तरीही आशेचा दुसरा एक किरण निर्माण झाला आहे. अनेक श्रीमंत देशांनी त्यांच्याकडील लोकसंख्येपेक्षा कितीतरी अधिक प्रमाणात लस विकत घेतली असल्याने ते उर्वरित लशींचा साठा इतर जगासाठी उपलब्ध करून देतील, अशी आशा आहे. त्यांनी मदत केल्यास जागतिक लसीकरण मोहिमेला मोठे बळ मिळेल,’ असे बर्कले यांनी सांगितले.
भारत भाग्यवान : जागतिक बँक
संसर्गाच्या या संकटकाळात लस उत्पादनाची सर्वाधिक क्षमता असलेली सीरम इन्स्टिट्यूट भारतात असल्याने हा देश भाग्यवान ठरत असल्याचे जागतिक बँकेचे अध्यक्ष डेव्हिड मालपास मंगळवारी (ता.६) म्हणाले. रुग्णसंख्या वाढत असली तरी भारतात लसीकरणाला वेग येत असल्याबद्दलही त्यांनी समाधान व्यक्त केले. सर्व देशांनी आपापली देशांतर्गत लशींची गरज आणि ते इतरांना किती पुरवठा करू शकतात, याबाबत निश्चित माहिती जाहीर करावी, असे आवाहन त्यांनी एका बैठकीदरम्यान केले. अद्यापही अमेरिका, युरोप, दक्षिण आफ्रिका आणि भारतानेही याबाबत ठोस आकडे प्रसिद्ध केले नसल्याचे मालपास यांनी सांगितले.
- जगभरातील बातम्या वाचण्यासाठी येथे ► क्लिक करा
(Edited by: Ashish N. Kadam)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.