Iran Israel War:

आधीच तणावग्रस्त असलेल्या पश्चिम आशियामध्ये इराणने इस्रायलवर केलेल्या क्षेपणास्त्र हल्ल्यानंतर वातावरण तापले आहे. या मुळे संभाव्य युद्धजन्य स्थिती लक्षात घेऊन भारताने चिंता व्यक्त केली आहे. तसेच, प्रादेशिक शांतता आणि सुरक्षेला धोका होईल असा मार्ग टाळण्याचे आणि राजनैतिक संवादाचा मार्ग अवलंबण्याचे आवाहन केले आहे.

इराणच्या दमास्कसमधील वाणिज्य दूतावासावर इस्रायली हल्ल्याला प्रत्युत्तर म्हणून इराणने काल हा हल्ला केला. या हल्ल्यावर भारतीय परराष्ट्र मंत्रालयाने तातडीने प्रतिक्रिया देत, परिस्थिती चिघळेल अशी कृती टाळण्याचे आणि मुत्सद्देगिरीच्या मार्गावर परत जाण्याचे आवाहन केले.

दरम्यान, या देशांमधील भारतीय वकीलातीचे अधिकारी तेथील भारतीय समुदायाच्या संपर्कात असल्याचेही परराष्ट्र मंत्रालयाने म्हटले आहे.

परराष्ट्र मंत्रालयाने या संघर्षावर जारी केलेल्या अधिकृत निवेदनात म्हटले आहे, की इस्रायल आणि इराणमधील तणाव वाढल्याने चिंता वाटते आहे. यामुळे या प्रदेशातील शांतता आणि सुरक्षितता धोक्यात आली आहे. दोन्ही देशांनी संयम बाळगावा, हिंसाचार टाळून मुत्सद्देगिरीच्या मार्गावर परत यावे. पश्चिम आशियातील बदलणाऱ्या परिस्थितीवर भारत बारकाईने लक्ष ठेवून आहे, असेही परराष्ट्र मंत्रालयाने स्पष्ट केले.

दरम्यान, इराणच्या सैन्याने होर्मुझच्या सामुद्रधुनीजवळ इस्रायलशी संबंधित मालवाहू जहाज ताब्यात घेतले आहे. या जहाजात १७ भारतीय क्रू मेंबर आहेत. या भारतीयांची सुटका करण्यासाठी भारत इराणच्या संपर्कात आहे.