दुबई - येमेनच्या जवळ लाल समुद्रात गेल्या अनेक वर्षांपासून नांगर टाकून उभ्या असलेल्या इराणच्या मालवाहतूक जहाजावर हल्ला झाल्याचा दावा विदेशी माध्यमांनी केला असून इराणच्या सरकारी वृत्त माध्यमांनीही याची दखल घेतली आहे. या जहाजाचा वापर इराणच्या सैन्याचा तळ म्हणून केला जात असल्याचे समजते.
इराणचे एमव्ही साविझ हे मालवाहतूक जहाज अनेक वर्षांपासून लाल समुद्रात आहे. यावरून सौदी अरेबियाने अनेकवेळा टीका केली आहे. या जहाजाचा वापर करून येमेनमधील हौथी बंडखोरांना इराण शस्त्रपुरवठा करत असल्याचा त्यांचा आरोप आहे. इराणने बंडखोरांशी संबंध असल्याचे अनेकदा नाकारले असले तरी या बंडखोरांकडून जप्त केलेल्या शस्त्रांचा स्रोत इराणमध्येच असल्याचे उघड झाले आहे. अशा परिस्थितीत या जहाजावरच हल्ला झाला असून तो इस्राईलने केल्याचा संशय व्यक्त होत आहे.
जहाजावर स्फोट झाल्याचे विदेशी माध्यमांनी म्हटले आहे. इराण आणि सहा देशांमध्ये अणुकराराची अंमलबजावणी करण्याबाबत सध्या व्हिएन्ना येथे चर्चा सुरु असून अमेरिका या करारात पुन्हा सामील होण्याचा निर्णय घेऊ शकते. जहाजावरील हल्ल्याचा या चर्चेवर परिणाम होणे शक्य आहे. याकराराला इस्राईलचा तीव्र विरोध आहे.
इस्राईलचे पंतप्रधान बेंजामिन नेतान्याहू यांनी संसदेतील ताज्या भाषणात विरोध केला होता. इस्राईलच्या अस्तित्वाला आणि जागतिक सुरक्षेलाही इराणचा धोका असल्याने या देशाबरोबर कोणताही करार केला जाऊ नये, असे आवाहन त्यांंनी केले होते.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.