दमास्कसः इराणसोबतच्या युद्धानंतर इस्रायलने आता आणखी एका युद्धात उडी घेतली आहे. इस्राईलने शेजारील देश सीरियावर बुधवारी (ता. १६) हवाई हल्ला केला. इस्राईलने राजधानी दमास्कसमधील सीरियाच्या लष्कराच्या मुख्यालयावर आणि सीरियाच्या संरक्षण मंत्रालयावर हल्ला केला आहे.
इस्राईलच्या लष्कराने याबाबत एक निवेदन जारी केले. दमास्कस प्रदेशातील सीरियाच्या लष्करी मुख्यालयाच्या प्रवेशद्वारावर हल्ला केला आहे, असे या निवेदनात म्हटले आहे. ड्रुझ नागरिकांच्या सुरक्षिततेसाठी हल्ला केल्याचा दावा इस्राईलने केला आहे.
इस्राईलच्या लष्कराच्या माहितीनुसार, ‘दक्षिण सीरियातील घडामोडींवर आणि सरकारच्या कृतीवर आम्ही लक्ष ठेवून आहोत. स्वैदा या ड्रुझबहुल शहरात सुरू असलेल्या संघर्षादरम्यान इस्राईलने हवाई हल्ले केले. तेथे सरकार आणि ड्रुझ गटातील शस्त्रसंधी कराराचा भंग झाला आहे.’ हे सर्व हल्ले ड्रुझ समुदायाच्या संरक्षणासाठी केल्याचा दावा इस्राईलने केला आहे.
इस्राईलने ‘ड्रुझ’च्या संरक्षणाचा मुद्दा उपस्थित केला आहे. ड्रुझ हे सीरियातील अल्पसंख्याक आहेत. जगभरातील अंदाजे दहा लाख ड्रुझ लोकांपैकी निम्म्याहून अधिक जण सिरियामध्ये वास्तव्यास आहेत. लेबनॉन आणि इस्रायलमध्येही त्यांची मोठी लोकसंख्या आहे. या आठवड्याच्या सुरुवातीपासून हा तणाव सुरू झाला आहे, सीरियाच्या सरकारने स्थानिक ड्रुझ सैनिकांच्या ताब्यात असलेल्या भागांवर ताबा मिळवण्यासाठी सैन्य तैनात केले. त्यानंतर या दोघांमध्ये संघर्ष झाला आणि १०० पेक्षा जास्त जणांचा मृत्यू झाला. दरम्यान, इस्राईलनेही युद्धात प्रवेश केला आहे. त्यामुळे हा संघर्ष आणखी वाढू शकतो.
जॉर्डन, कतार, इराण, कुवेत आणि सौदी अरेबियासारख्या आखाती देशांनी सिरियावर इस्राईलच्या हल्ल्यावर तीव्र प्रतिक्रिया दिली आहे. सिरियावरील हल्ल्याचा निषेध करताना जॉर्डनच्या परराष्ट्र मंत्रालयाने याला आंतरराष्ट्रीय कायद्याचे उल्लंघन असल्याचे म्हटले आहे. सीरियातील स्थैर्य, सार्वभौमत्व आणि सुरक्षेला धोका म्हणून या हल्ल्याकडे पाहायला हवे, असेही जॉर्डनने म्हटले आहे. कतारचे परराष्ट्र राज्यमंत्री महम्मद बिन अब्दुल अझीझ बिन सालेह अल-खुलाईफी यांनीही या हल्ल्याचा निषेध केला. सीरियातील घडामोडींवर आमचे लक्ष आहे. तेथील नागरिकांची सुरक्षितता महत्त्वाची आहे, असे ते म्हणाले.
इस्राईलचे पंतप्रधान बेंजामिन नेतान्याहू यांनी ड्रुझ समाजाचे रक्षण करणार असल्याचे म्हटले आहे. ते म्हणाले, ‘सरियाचे सरकार स्वैदामध्ये शस्त्रांसह पोहोचले होते. त्यांचा योग्य प्रतिकार करण्याचे आदेश देण्यात आले आहेत. सीरियाच्या ड्रुझ समुदायाशी आमचे खोल नाते आहे. त्यामुळे आम्ही त्या समाजाचे रक्षण करणार आहोत.’’
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.