इस्त्राइल आणि दहशतवादी संघटना हमास यांच्यात युद्ध पेटलं आहे.याच्या झळा अनेक सामान्य नागरिकांना बसत आहेत. हमासने केलेल्या हल्ल्याचे अनेक व्हिडीओ सोशल मीडियावर व्हायरल होत आहेत.

हमासने नोव्हा म्युझिक फेस्टिव्हल (Nova Music Festival) वर केलेल्या हल्ल्याचे देखील काही व्हिडीओ समोर आले आहेत. या व्हिडीओमध्ये लोक जीव वाचवण्यासाठी पळताना दिसत आहेत. हमासच्या या हल्ल्यात सुमारे 260 लोक मारले गेले आहेत. मिळालेल्या माहितीनुसार रविवारी गाझा जवळील किबुट्झ रीइम (Kibbutz Re'im) जवळ हा म्युझिक फेस्टिव्हल आयोजित करण्यात आला होता.

ज्यूंचा सण सुक्कोट (Sukkot)च्या समाप्तीनिमित्त साजरा करण्यात येत असलेल्या म्युझिक फेस्टिव्हलमध्ये सुमारे 3,000 लोक सहभागी झाले होते. ज्यामध्ये बहुतेक तरुण हे इस्रायली होते. इस्रायली रेस्क्यू सर्व्हिस झाका (Zaka) ने दिलेल्या माहितीनुसार त्यांनी या म्युझिक फेस्टिव्हलच्या ठिकाणाहून 260 मृतदेह बाहेर काढले आहेत.

दहशतवाद्यांनी या म्युझिक फेस्टिव्हलमध्ये सहभागी झालेल्यांना घेरले आणि गोळीबार करत कित्येकांना ठार केले. यानंतर, दहशतवादी परिसरात लपलेल्या नागरिकांचा शोध घेऊन त्यांना ठार केलं. तसेच अनेकांना ओलीस ठेवण्यात आलं, असे द टाइम्स ऑफ इस्रायल वृत्तापत्राने दिलेल्या रिपोर्टमध्ये म्हटले आहे.