महादेव बेटिंग अ‍ॅपचा प्रमोटर सौरभ चंद्राकर याला लवकरच पकडून भारतात आणले जाऊ शकते.संयुक्त अरब अमीरात (यूएई) च्या अधिकाऱ्यांनी चंद्राकर याच्या लोकेशनचा तपास लागला असून त्याला नजरबंद करण्यात आले आङे.

चंद्राकर हा महादेव ऑनलाईन बेटिंग अ‍ॅप प्रकरणातील दोन मुख्य आरोपी मालकांपैकी एक आहे.या प्रकरणाचा संबंध मनी लॉन्ड्रींगशी असून ईडी या प्रकरणाचा तपास करत आहे. चंद्राकर दुबईमधून त्याचा धंदा चालवत होता.

सध्या नजरकैदेत असलेल्या चंद्राकर याला बाहेर पडण्यास मनाई करण्यात आली आहे, कारण तो देश सोडून पळून जाण्याची शक्यता आहे. सध्या त्याच्या हलचालींवर नजर ठेवली जात आहे. महादेव अ‍ॅप केस एक हाय प्रोफाईल घोटाळा असून यामध्ये एका ऑनलाइन सट्टेबाजी प्लॅटफॉर्मचा समावेश आहे. या प्लॅटफॉर्मच्या माध्यमातून पोकर, कार्ड गेम, बॅडमिंटन, टेनिस, फुटबॉल आणि क्रिकेट अशा अनेक खेळांवर सट्टा लावला जाऊ शकतो.

इंडिया टुडेच्या वृत्तानुसार, ईडीच्या विनंतीनुसार, इंटरपोलने सौरभ चंद्राकरबाबत रेड कॉर्नर नोटीस जारी केली होती. युएई या रेड कॉर्नर नोटीसनंतर याप्रकरणात कारवाई करत आहे. भारतीय अधिकारी चंद्रकरला भारताकडे प्रत्यार्पण करण्याची प्रक्रिया पुन्हा एकदा सुरू करतात याची सध्या दुबई पोलिस वाट पाहात आहेत, जेणेकरून ते त्याला तात्काळ अटक करू शकतील. भारताने यूएईसोबत प्रत्यार्पण करार केला आहे, ज्यामुळे चंद्राकरला भारतात आणणे सोपे होणार आहे.

प्रकरण काय आहे?

छत्तीसगडमधील रायपूर येथील मनी लाँडरिंग प्रतिबंधक कायद्यांतर्गत (पीएमएलए) विशेष न्यायालयात खटला सुरू आहे. या प्रकरणाच्या आधारे महादेव अॅपचा प्रमोटरसौरभ चंद्राकर यांच्याविरुद्ध मनी लाँड्रिंगचा तपास सुरू आहे. हा तपास देशाच्या केंद्रीय यंत्रणांकडून केला जात आहे. तपास एजन्सीच्या म्हणण्यानुसार, सौरभ चंद्राकर आणि रवी उप्पल नावाचा आणखी एक प्रमोटर युएईमधील त्यांच्या कार्यालयातून महादेव बेटिंग अ‍ॅप ऑपरेट करायचे.

या दोघांनी या अ‍ॅपद्वारे मनी लाँड्रिंग आणि हवाला व्यवहार केले आहेत. या प्रकरणात किमान 6000 कोटी रुपयांचा घोटाळा झाल्याचे सांगण्यात येत आहे. उप्पलला डिसेंबरच्या सुरुवातीला दुबईत स्थानिक अधिकाऱ्यांनी ताब्यात घेतले होते. उप्पलला भारतात आणण्यासाठी अधिकारी यूएईच्या अधिकाऱ्यांच्या संपर्कात असल्याचे त्यावेळी तपास यंत्रणेने सांगितले होते.