नवी दिल्ली- चीनच्या दौऱ्यावरुन परत आलेले मालदीवचे अध्यक्ष मोहम्मद मुइझू हे भारताविरोधात कठोर होताना दिसत आहेत. मुइझू यांनी मालदीवमधील भारतीय सैन्य परत बोलवण्याचा जुना राग पुन्हा छेडला आहे. पंतप्रधान मोदी यांच्या विषयी मालदीवमधील तीन उपमंत्र्यांनी अवमानकारक भाषा वापरली होती. तेव्हापासून दोन्ही देशांमधील संबंधांत तणाव निर्माण झाला आहे.( Maldivian government has asked India to withdraw its military presence from the nation amid a diplomatic row)

मुइझू सरकारने मालदीवमधील भारतीय सैन्य परत बोलवण्याचा प्रस्ताव भारताकडे पाठवला आहे. मालदीवने भारताला १५ मार्चपर्यंतचा वेळ दिला आहे. मुइझू ५ दिवसांच्या चीनच्या दौऱ्यावर गेले होते. यावेळी त्यांनी चीनचे अध्यक्ष क्षी जिनपिंग यांची भेट घेतली होती. चिनी पर्यटकांनी मालदीवमध्ये मोठ्या प्रमाणात यावं असं आवाहन यावेळी मुइझू यांनी केलं होतं.

चीनवरुन परत आलेल्या मुइझू यांचे वर्तन भारताविरोधात अधिक आक्रमक झाल्याचं दिसत आहे. त्यातूनच त्यांनी भारतीय सैनिकांना १५ मार्चपर्यंत पर्यंत परत बोलावण्याचा प्रस्ताव दिला आहे. भारतासाठी हा चिंतेचा विषय आहे. कारण, हिंद महासागरात चीन आपला प्रभाव वाढवू पाहत आहे. त्यात भारता शेजारी महत्त्वाच्या भौगोलिक क्षेत्रात असलेला मालदीवसारखा देश आपल्या विरोधात जाणे हिताचे ठरणार नाही.

मालदीवमध्ये निवडणुकीदरम्यान मुइझू यांच्या पक्षाने भारत विरोधात प्रचार केला होता. मालदीवमधील भारतीय लष्कराच्या बाबतही त्यांनी प्रोपेगेंडा केला होता. निवडणुकीदरम्यान मुइझू यानी जनतेला आश्वासन दिलं होतं की, सत्तेत आल्यास भारतीय सैनिकांना परत पाठवलं जाईल. निवडून आल्यानंतर त्यांनी लगेच सैनिकांना परत बोलावण्याची औपचारिक विनंती भारत सरकारकडे केली होती.

मुइझू यांच्या आधीच्या सरकारच्या विनंतीनुसारच, भारतीय सैनिकांची छोटी तुकडी मालदीवमध्ये पाठवण्यात आली होती. ही भारतीय टीम समुद्री सुरक्षा आणि आपत्ती व्यवस्थापन क्षेत्रात काम करते. मुइझू हे चीन समर्थक मानले जातात. चीनला फायद्याचे ठरतील असे निर्णय ते घेताना दिसत आहेत. पण, यामुळे भारताची डोकेदुखी वाढणार आहे. (Latest Marathi News)