इस्लामाबाद : पाकिस्तानचे माजी राष्ट्रपती आणि माजी लष्करप्रमुख परवेज मुशर्रफ यांनी पाकिस्तानमध्ये होणाऱ्या सार्वत्रिक निवडणुकीत कुख्यात दहशतवादी संघटना लष्कर-ए-तोयबा आणि जमात-उद-दावासोबत युती करणार असल्याचे सांगितले आहे. तसेच लष्कर-ए-तोयबा आणि जमात-उद-दावा या दोन्ही संघटना राष्ट्रभक्त आहेत, असेही ते म्हणाले.

पाकिस्तानातील एका वृत्तवाहिनीला दिलेल्या मुलाखतीत मुशर्रफ बोलत होते. ते म्हणाले, इस्लामाबादच्या सुरक्षेसाठी लष्कर-ए-तोयबा आणि जमात-उद-दावा या संघटनांसोबत आघाडी करणार आहोत. या संघटनेतील लोकांनी देशासाठी प्राणांची आहुती दिली आहे. या दोन्ही संघटना राष्ट्रभक्त आहेत. तसेच जर लष्कर-ए-तोयबा आणि जमात-उद-दावा या दोन्ही संघटना राजकीय पक्ष स्थापन करत असतील तर त्यांना कोण विरोध करणार असा सवालही त्यांनी विचारला.

दरम्यान, मुशर्रफ यांनी काही दिवसांपूर्वी मी लष्कर-ए-तोयबाचा समर्थक आहे. लष्कर-ए-तोयबा आणि जमात उद दावाचे लोकांना मी आवडतो, असे म्हणाले होते. त्यानंतर त्यांनी आता निवडणुकीत या दोन्ही संघटनांशी युती करणार असल्याचे सांगितले आहे.