मेक्सिकोतील जलिस्को इथं एका २३ वर्षीय सोशल मीडिया इन्फ्लुएन्सर तरुणीची हत्या करण्यात आलीय. टीकटॉकवर लाइव्ह सुरू असतानाच तिच्यावर गोळ्या झाडण्यात आल्या. जापोपान शहरात ही घटना घडली असून वलेरिया मार्केज असं हत्या झालेल्या इन्फ्लुएन्सर तरुणीचं नाव आहे. ब्युटी सलूनमध्ये टिकटॉक लाइव्ह सुरू असतानाच तिच्यावर गोळीबार झाला.

लाइव्ह स्ट्रीममध्ये वलेरिया मार्केज ही डिलिव्हरी बॉयसोबत बोलत होती. त्यावेळी अचानक तिच्यावर गोळ्या झाडण्यात आल्या. तिच्या छातीवर आणि डोक्यात गोळ्या घुसल्या. यात तिचा जागीच मृत्यू झालाय. वलेरियाच्या डोक्यात गोळी लागताच रक्ताच्या चिळकांड्या समोरच्या टेबलवर पडल्या. तिच्या लाइव्ह स्ट्रिमिंगचा व्हिडीओ सोशल मीडियावर व्हायरल होत आहे.

धक्कादायक बाब म्हणजे वलेरियाच्या हत्येनंतर काही तासात त्याच परिसरातील कॅफेत एका पक्षाच्या माजी खासदाराचीही गोळ्या झाडून हत्या करण्यात आली. पीआरआय पक्षाचे माजी खासदार लुइस आर्मांडो कॉर्डोवा डियाज यांचीही हत्या झाली. या दोन घटनांमुळे खळबळ उडालीय.

वलेरिया मार्केज ही २३ वर्षीय सोशल मीडिया इन्फ्लुएन्सर होती. ती सौंदर्य प्रसाधनांचे ऑनलाइन मार्केटिंग करत असे. इन्स्टाग्रामवर जवळपास दीड लाख तर टिकटॉकवरही तितकेच फॉलोअर्स होते. तिच्या पोस्टवर चाहत्यांनी श्रद्धांजली वाहिलीय.