पोर्ट ऑ प्रिन्स (हैती)- हैतीमध्ये धक्कादायक प्रकार घडला आहे. कारागृहातून 400 हून अधिक कैदी फरार झाले आहेत. यावेळी झालेल्या गोळीबारात तुरुंग अधिक्षकासमवेत 25 जणांचा मृत्यू झाला आहे. ही घटना गुरुवारी राजधानी पोर्ट ऑ प्रिन्सच्या ईशान्य दिशेला असलेल्या क्रुआ दि बुके सिव्हिल कारागृहात घडली. ज्यावेळी हा प्रकार घडला त्यावेळी कारागृहात 1542 कैदी होते. 

हा तुरुंग 2012 मध्ये उभारण्यात आला होता. वर्ष 2014 मध्ये याच तुरुंगातून 300 हून अधिक कैदी फरार झाले होते. अर्नेल जोसेफ या गुन्हेगाराला तुरुंगातून नेण्यासाठी त्याच्या टोळीच्या लोकांनी हा प्रकार केल्याचे अधिकाऱ्यांनी सांगितले. बलात्कार, अपहरण आणि हत्येच्या आरोपाखाली 2019 मध्ये जोसेफला अटक करण्यात आली होती.

हेही वाचा- 'त्या' घटनेनंतर मुकेश अंबानींच्या घराबाहेर चोख सुरक्षा बंदोबस्त, जाणून घ्या संपूर्ण घटनाक्रम

कारागृह अधिक्षकाचा गोळीबारात मृत्यू
तुरुंगातून फरार झाल्यानंतर तो मोटारसायकलवर जात होता. परंतु, पोलिसांच्या गोळीबारात त्याचा खात्मा झाला. 60 कैद्यांना पकडण्यात आले आहे. उर्वरित कैद्यांचा शोध घेतला जात आहे. कैदी कसे फरार झाले, याचा शोध घेण्यासाठी आयोगाची स्थापना करण्यात आली आहे. गोळीबाराच्या घटनेत कारागृह अधिक्षक पॉल जोसेफ हेक्टर यांचाही मृत्यू झाला आहे. 

हेही वाचा- Super Exclusive: 'या' आरोपाखाली चित्रा वाघ यांच्या पतीविरोधात गुन्हा दाखल

स्थानिकांनी सांगितले की, कैदी फरार होण्यापूर्वी मोठ्या संख्येने शस्त्रास्त्र सज्ज लोकांनी तुरुंगातील सुरक्षा कर्मचाऱ्यांवर अंदाधुंद गोळीबार केला. हा गोळीबार खूप वेळ सुरु होता. दरम्यान, हैतीचे राष्ट्राध्यक्ष जोवलेन मोइस यांनी शुक्रवारी टि्वट करुन या प्रकाराबद्दल खेद व्यक्त केला असून लोकांना धैर्य राखण्याचे आवाहन केले आहे.