ढाका : बांगलादेशच्या पंतप्रधान शेख हसीना (Bangladesh PM Sheikh Hasina) यांनी रोहिंग्या (Rohingya) स्थलांतरितांचं वर्णन बांगलादेशसाठी मोठं ओझं असल्याचं म्हटलंय. शेख हसीना म्हणाल्या, 'दहा लाखांहून अधिक रोहिंग्या स्थलांतरितांचा बांगलादेशवर मोठा भार आहे. भारत (India) या मुद्द्यावर मोठी भूमिका बजावू शकतो आणि ते (रोहिंग्या) त्यांच्या मायदेशी परत जावेत यासाठी देश आंतरराष्ट्रीय समुदायांशी चर्चा करत आहे. रोहिंग्यांच्या उपस्थितीमुळं आमच्यासमोर मोठ्या अडचणी निर्माण झाल्या आहेत, असंही त्यांनी स्पष्ट केलं.

पंतप्रधान हसीना पुढं म्हणाल्या, मला वाटतं की भारत ही समस्या सोडवण्यात महत्त्वाची भूमिका बजावू शकतो. बांगलादेशातील लाखो रोहिंग्यांच्या उपस्थितीमुळं त्यांच्या राजवटीला आव्हानं निर्माण झाल्याची कबुलीही हसीना यांनी एएनआयशी बोलताना दिली. 'आमच्या देशात 11 लाख रोहिंग्या आहेत. आम्ही आंतरराष्ट्रीय समुदाय आणि आमच्या शेजारी देशांशी देखील सल्लामसलत करत आहोत. त्यांनीही काही पावलं उचलली पाहिजेत, जेणेकरून ते मायदेशी परत जातील.'

रोहिंग्यांनी मायदेशी परतावं : शेख हसीना

आमच्या सरकारनं मानवतावादी पैलू लक्षात घेऊन विस्थापित समुदायाची काळजी घेण्याचा प्रयत्न केलाय. मानवतावादी आधारावर आम्ही त्यांना आश्रय देत आहोत आणि सर्व काही पुरवत आहोत. परंतु, या कोविड दरम्यान आम्ही सर्व रोहिंग्या समुदायाचं लसीकरण केलं. पण, ते इथं किती दिवस राहणार? त्यामुळं ते छावणीतच आहेत. काही लोक अमली पदार्थांची तस्करी, महिलांची तस्करी करताहेत. त्यात दिवसेंदिवस वाढ होत असल्याचंही त्यांनी सांगितलं. त्यामुळं ते जितक्या लवकर मायदेशी परततील, ते आपल्या देशासाठी आणि म्यानमारसाठीही (Myanmar) चांगलं आहे, असंही हसीनांनी सांगितलं. आम्ही रोहिंग्यांसाठी आंतरराष्ट्रीय समुदाय आणि आसियान किंवा संयुक्त राष्ट्रांसारख्या इतर देशांशीही चर्चा करत आहोत, असं हसीना म्हणाल्या.