इस्लामाबाद : पाकिस्तानचे (Pakistan) माजी पंतप्रधान आणि पीटीआयचे प्रमुख इम्रान खान (Imran Khan) यांना दिलासा मिळताना दिसत आहे.

लाहोरमधील न्यायालयानं (Lahore Court) माजी पंतप्रधान आणि पीटीआय प्रमुख इम्रान खान यांना जाळपोळ, पोलिसांविरुद्ध हिंसाचार आणि हत्या या तीन प्रकरणांमध्ये अंतरिम जामीन मंजूर केला आहे. पाकिस्तानच्या मीडिया रिपोर्ट्सनुसार, तीन प्रकरणांमध्ये अंतरिम जामीन 13 एप्रिलपर्यंत वाढवण्यात आला आहे.

या वर्षी मार्चमध्ये पाकिस्तानी पोलिसांनी माजी पंतप्रधान इम्रान खान आणि पीटीआयच्या डझनहून अधिक नेत्यांविरोधात दहशतवादाचा गुन्हा दाखल केला होता. त्यांच्याविरुद्ध येथील न्यायालयीन संकुलाबाहेर तोडफोड, सुरक्षा कर्मचाऱ्यांवर हल्ला करणं आणि गोंधळ घालणं असे गुन्हे दाखल करण्यात आले आहेत.

तोशाखाना खटल्याच्या सुनावणीला उपस्थित राहण्यासाठी इम्रान खान लाहोरहून इस्लामाबादला पोहोचले, तेव्हा त्यांच्या कार्यकर्त्यांनी गोंधळ घातला होता. पाकिस्तान तेहरीक-ए-इन्साफचे कार्यकर्ते आणि पोलिस यांच्यात झालेल्या संघर्षात 25 हून अधिक सुरक्षा कर्मचारी जखमी झाले होते.

याप्रकरणी अटक करण्यात आलेले पीटीआय कार्यकर्ते आणि पक्षाच्या नेत्यांवर गुन्हा दाखल करण्यात आला होता. इस्लामाबाद पोलिसांनी दाखल केलेल्या एफआयआरमध्ये सुमारे 17 पीटीआय नेत्यांची नावं आहेत. कार्यकर्त्यांनी पोलिस चौकी आणि न्यायालयीन संकुलाच्या मुख्य गेटचं नुकसान केल्याचं एफआयआरमध्ये म्हटलंय. न्यायालयीन संकुलाच्या इमारतीची जाळपोळ, दगडफेक आणि तोडफोड केल्याप्रकरणी 18 जणांना अटक करण्यात आली आहे.