इस्लामाबाद : पाकिस्तानचे पंतप्रधान इम्रान खान यांनी पुन्हा एकदा प्रचलित व्यवस्थेवर निशाणा साधला आहे. व्यवस्थेने आपल्यासमोर राजीनामा, अविश्वासाच्या ठरावाला सामोरे जाणे आणि निवडणुका असे तीन पर्याय ठेवले होते, असा दावा केला आहे.दरम्यान इम्रान यांनी त्यांच्या वक्तव्यामध्ये ‘व्यवस्था’ हा शब्द नेमका कोणाला उद्देशून वापरला हे मात्र स्पष्ट होऊ शकलेले नाही. सातत्याने पाकिस्तानच्या राजकारणामध्ये हस्तक्षेप करणाऱ्या लष्करानेच इम्रान यांना बाजूला करण्याचे कारस्थान आखल्याचे बोलले जाते. या घडामोडींच्या पार्श्वभूमीवर पाकिस्तानचे लष्करप्रमुख जनरल कमर जावेद बाजवा यांनी इम्रान खान यांची भेट घेतली होती.

या भेटीमुळे अनेकांच्या भुवया उंचावल्या होत्या. या भेटीत आपल्यासमोर तीन पर्याय ठेवण्यात आल्याचा दावा इम्रान यांनी केला. ‘आम्हाला निवडणुका घेणे हाच चांगला पर्याय वाटतो. मी राजीनामा देण्याचा विचार देखील करू शकत नाही. राहिला प्रश्न अविश्वासदर्शक ठरावाचा यावर शेवटपर्यंत लढा देऊ.’ असेही इम्रान यांनी म्हटलेे. अविश्वासदर्शक ठरावावरील मतदानाच्या पार्श्वभूमीवर ‘तेहरिके इन्साफ’च्या अनेक खासदारांनी विरोधकांना पाठिंबा देऊ केला आहे. यावर ते म्हणाले की, ‘‘अशा लोकांना सोबत घेऊन सरकार चालविणे शक्य नाही त्यामुळे पुन्हा निवडणुका होणे कधीही चांगलेच असा दावा त्यांनी केला.’’

भारतासोबत चर्चेची तयारी: बाजवा

इस्लामाबाद : पाकिस्तानच्या लष्कराने भारताबाबत पुन्हा नरमाईची भूमिका घेत सगळे वाद हे शांततेच्या मार्गाने चर्चेच्या माध्यमातून सोडविण्यात यावे असे म्हटले आहे. काश्मीरसह अन्य विषयांवर राजनैतिक मार्गाने तोडगा निघावा अशीच आमची इच्छा असल्याचे लष्करप्रमुख जनरल बाजवा यांनी सांगितले. इस्लामाबादेत आयोजित एका सुरक्षा परिषदेमध्ये बोलताना त्यांनी हे मत मांडले. आंतरराष्ट्रीय पातळीवरील जगभरातील अभ्यासक या परिषदेमध्ये सहभागी झाले आहेत. बाजवा म्हणाले की, ‘‘ आखाती देशांतील एक तृतीयांश एवढे देश हे सध्या कोणत्या ना कोणत्या तरी संघर्षात आणि युद्धामध्ये गुंतले आहेत. या युद्धाच्या ज्वाळा आम्ही आमच्या प्रदेशापासून दूर ठेवल्या हेच आमचे मोठे यश आहे.’’