पेशावर : मुलगा होण्याची हमी देत भोंदूबाबाने गर्भवती महिलेच्या डोक्यात खिळा ठोकण्याची धक्कादायक घटना पाकिस्तानातील पेशावरमध्ये घडली आहे. खिळा पाच सेंटीमीटर लांबीचा होता, मात्र तिच्या सुदैवाने मेंदूला इजा झाली नाही. आणखी धक्कादायक म्हणजे तीन मुलांची आई असलेल्या या महिलेने आपल्या पोटात आणखी एक मुलगी असल्याचे डॉक्टरांना सांगितले.

वेदना होऊ लागल्यानंतर संबंधित महिलेने पक्कड घेऊन स्वतः खिळा काढण्याचा प्रयत्न केला, पण ते शक्य झाले नाही. त्यामुळे ती रुग्णालयात गेली. डॉक्टर हैदर खान यांनी याविषयी अधिक माहिती दिली. संबंधित महिला पूर्णपणे शुद्धीवर होती, पण तिला खूप वेदना होत होत्या. कथित धर्मगुरुच्या सांगण्यावरून आपण खिळा ठोकल्याचे ती आधी सांगत होती. नंतर हे कृत्य त्यानेच केल्याची कबुली तिने दिली. हातोडा आणि इतर काही जड वस्तूंचा वापर करून खिळा ठोकण्यात आला होता.

पेशावर पोलिस भोंदूबाबाच्या चौकशीसाठी महिलेकडून आणखी माहिती घेणार आहेत. रुग्णालयातून सीसीटीव्हीचे छायाचित्रण मिळवून ते महिलेकडे जाणार आहोत. आम्ही भोंदूबाबाला लवकरच बेड्या ठोकू, असे पोलिस प्रमुख अब्बास एहसान यांनी सांगितले.