डॉक्टरांच्या निष्काळजीपणाची एक भयंकर घटना समोर आली आहे. डॉक्टरांनी नवजात शिशूचं कापलेलं शिर महिलेच्या गर्भाशयातच ठेवलं आहे. त्यामुळे या ३२ वर्षीय हिंदू महिलेच्या जीवाला धोका निर्माण झाला आहे. (Pakistan Staff cut off new born baby's head and pull out the rest of the body)

पाकिस्तानात ही भयावह घटना घडली आहे. पाकिस्तानातल्या सिंध इथल्या ग्रामीण आरोग्य केंद्रात एक गर्भवती महिला गेली होती. मात्र या केंद्रात कोणीही महिला स्त्रीरोग तज्ज्ञ नव्हती. त्यामुळे अननुभवी वैद्यकीय कर्मचाऱ्यांनी तिच्यावर उपचार केले. त्यानंतर तिच्यासोबत ही भयंकर घटना घडली आहे.

नक्की घडलं काय?

या गर्भवती महिलेला प्रचंड त्रास होऊ लागला. त्यानंतर तिला जवळच्याच मिठी रुग्णालयात नेण्यात आलं. मात्र तिथे तिच्यावर उपचार करण्यासाठी डॉक्टर्स उपलब्ध नव्हते. त्यामुळे तिच्या घरच्यांनी तिला ग्रामीण आरोग्य केंद्रात आणलं. आता तिच्या जीवाला धोका होता. त्यामुळे या केंद्रावरच्या कर्मचाऱ्यांनी या बाळाला बाहेर काढण्याचं ठरवलं. या बाळाला बाहेर काढत असताना त्याचं शरीर तर बाहेर आलं, पण शीर मात्र गर्भाशयातच अडकलं. त्यामुळे महिलेचा जीव वाचवण्यासाठी शीर कापावं लागलं. मात्र हे शीर गर्भाशयातच राहिलं.

या धक्कादायक आणि गंभीर प्रकाराची तात्काळ दखल घेत सिंध आरोग्य सेवेचे संचालक डॉ. जुमन बहोतो यांनी या प्रकरणाच्या चौकशीचे आदेश दिले आहेत. ही घटना घडत असताना काही कर्मचाऱ्यांनी या सगळ्याचे व्हिडीओज आणि फोटो काढत ते सोशल मीडियावर शेअरही केले होते. त्यावरही कारवाई करण्याचे आदेश देण्यात आले आहेत.