Pakistan terrorist attack on police station : पाकिस्तानात आठ फेब्रुवारी रोजी निवडणूका होणार आहेत. याआधी दहशदवादी कारवायांना वेग आल्याचे पाहायला मिळत आहेत. पाकिस्तानातील खैबर पख्तूनख्वा प्रांतात डेरा इस्माइल खान येथे एका पोलीस स्टेशनवर दहशतवाद्यांनी हल्ला केल्याचा प्रकार समोर आला आहे. या हल्ल्यात १० पोलीस कर्मचारी ठार झाले आहेत.

पोलीसांनी सोमवारी दिलेल्या माहितीनुसार खैबर पख्तूनख्वा प्रदेशात झालेला हा हल्ला रात्री उशीरा करण्यात आला. यामध्ये किमान १० पोलीस कर्मचारी ठार झाले तर इतर सहा जण जखमी झाले आहेत. त्यांना रुग्णालयात दाखल करण्यात आले आहे.

पोलीसांनी दिलेल्या माहितीनुसार दहशतवाद्यानी तीन वाजता पोलीस स्टेशनवर हल्ला चढवला. दहशतवाद्यांनी चारही बाजूंनी गोळीबार करत ग्रेनेड हल्ला केला. पोलीसांनी दहशतवाद्यांना प्रत्युत्तर देण्याचा प्रयत्न केला पण अंधाराचा फायदा घेत दहशतवादी पसार झाले. सुरक्षा दलाने दहशतवाद्यांना पकडण्यासाठी नाकेबंदी केली आहे. तेसेच शोधमोहिम सुरु करण्यात आली आहे. याठिकाणी रॅपीड अॅक्शन फोर्स देखील तैनात आहे.

पाकिस्तानात आठ फेब्रुवारी रोजी निवडणूका होणार आहेत. याआधी पाकिस्तानात दहशतवादी हल्ल्यांच्या घटना वाढल्या आहेत. काही दिवसांपूर्वी बलूचिस्तान मध्ये तीन दहशतवादी हल्ले झाले ज्यामध्ये चार सरकारी कर्मचारी आणि दोन नागरिक ठार झाले होते. यानंतर पाक सुरक्षा दलाने चकमकीत नऊ दहशतवाद्यांना ठार केलं होतं.