पोलंड : जगातील जवळपास सर्वच देशातील कुत्रे आणि घोडे राष्ट्राच्या सेवेत आपले योगदान देताना दिसतात. कोणत्याही प्रकारचे संकट असो वा अशक्य वाटणाऱ्या गुन्ह्याची उकल करणे असो, या सर्व प्रकारच्या कामात हे प्राणी आपले अमूल्य असे योगदान देतात. एवढं सगळं करुनही याच्या बदल्यात या प्राण्यांना फक्त जेवण आणि राहण्यासाठी जागा मिळते. मात्र सेवानिवृत्त झाल्यानंतर हे सगळं यांच्याकडून काढून घेतलं जातं. सरकार देखील यांची देखभाल करणं सोडून देते. मात्र युरोपातील एक देश या समस्येवर आता उपाय काढण्याच्या मार्गावर आहे. या देशाचं नाव आहे पोलंड! पोलंड पोलिस, बॉर्डर गार्ड या सेवांमधून निवृत्त होणाऱ्या कुत्र्यांना आणि घोड्यांना पेन्शन देण्याची योजना बनवत आहे. जेणेकरुन देशाची सेवा करणाऱ्यांना सेवा दिल्यानंतरही सामाजिक सुरक्षा प्राप्त होऊ शकेल. आतापर्यंत तरी सेवा देणाऱ्या कुत्र्यांना आणि घोड्यांना सेवानिवृत्तीनंतर सरकारी देखभाल मिळणे बंद होते आणि त्यांना गैरसरकारी संघटनांकडे अथवा तत्सम लोकांकडे सुपूर्द केलं जातं, जे त्यांना सांभाळू इच्छित असतात.  

हेही वाचा - पीरियड्सच्या दरम्यान डोळ्यातून येताहेत रक्ताचे अश्रू; काय आहे हा दुर्मिळ आजार?

सेवानिवृत्तीनंतर पेन्शन देण्याची योजना
आता सुरक्षा दले आणि पोलिसांच्या सदस्यांच्या विनंतीनंतर गृह मंत्रालयाने एका कायद्याचा प्रस्ताव ठेवला आहे. या कायद्याअंतर्गत कुत्र्यांना आणि घोड्यांना अधिकृतरित्या जर्जा आणि सेवनिवृत्तीनंतर पेन्शन देण्याची योजना आहे. जेणेकरुन यांच्या नव्या मालकांना त्यांची देखभाल करताना येणाऱ्या खर्चाचा कसलाही त्रास होऊ नये. गृहमंत्री मॉरिस कमिन्सकी यांनी प्रस्ताविक कायद्याच्या मसुद्याला एक नैतिक जबाबदारी म्हटलं आहे, ज्याला संसदेत सहमती मिळणे आवश्यक आहे. हे विधेयक या वर्षाच्या अखेरिस संसदेत सादर होईल. त्यांनी पुढे म्हटलंय की, या प्राण्यांमुळे माणसांचे प्राण वाचवले गेले आहेत, त्यामुळे त्यांचे आभार मानले गेले पाहिजेत. 

हेही वाचा - Viral Video : मुंगूस आहे की चित्रपटातला 'हिरो'? भल्याभल्यांना लाजवेल असा अभिनय!

1200 कुत्र्यांना मिळणार फायदा
या नव्या कायद्याचा फायदा सध्या सेवा देणाऱ्या जवळपास 1200 कुत्र्यांना आणि 60 हून अधिक घोड्यांना मिळेल. सरकारच्या म्हणण्यानुसार, प्रत्येक वर्षी जवळपास 10 टक्के जनावरे निवृत्त होतात. कुत्र्यांमध्ये अधिकतर जर्मन आणि बेल्जियान शेफर्ड आहेत.