युक्रेनसोबत सुरु असलेल्या युध्दादरम्यान (Russia Ukraine War) रशियाचे परराष्ट्र मंत्री सर्गेई लावरोव (sergey lavrov) गुरुवारी संध्याकाळी दिल्लीत दाखल झाले. दोन दिवसीय भारत दौऱ्यावर आलेले लावरोव उद्या पंतप्रधान नरेंद्र मोदी आणि परराष्ट्र मंत्री एस जयशंकर यांची भेट घेणार आहेत. व्लादिमीर पुतिन यांनी युक्रेनवर हल्ला केल्यानंतर मॉस्कोची ही उच्चस्तरीय भेट मानली जात आहे. ब्रिटीश परराष्ट्र मंत्री लिझ ट्रस यांच्या भेटीच्या अनुषंगाने सर्गेई लावरोव यांचा दौरा सुरू आहे. त्याच वेळी, गेल्या आठवड्यात चीनचे मंत्री वांग यी यांनीही जवळपास दोन वर्षांनी भारत दौऱ्यावर आले होते.

24 फेब्रुवारी रोजी रशियाने युक्रेनवर केलेल्या हल्ल्यानंतर रशियाच्या परराष्ट्रमंत्र्यांचा हा तिसरा परदेश दौरा आहे. या महिन्याच्या सुरुवातीला, ते त्यांच्या युक्रेनियन समकक्षांशी चर्चेसाठी तुर्कीला गेले होते तसेच त्यांनी बुधवारी चीनमध्ये बैठक घेतली.

पाश्चात्य निर्बंधानंतरही भारताने रशियाकडून वस्तूंची खरेदी सुरूच ठेवली आहे. गेल्या दशकात युनायटेड स्टेट्सकडून खरेदी वाढवूनही रशिया हा भारताचा संरक्षण उपकरणांचा सर्वात मोठा पुरवठादार आहे. याआधी, अमेरिका आणि त्याच्या मित्र राष्ट्रांनी लादलेल्या निर्बंधांना कमकुवत करणार्‍या रशियन प्रस्तावावर विचार केल्याबद्दल अमेरिका आणि ऑस्ट्रेलियाने भारतावर टीका केली होती