नवी दिल्ली : स्प्राईट (Sprite) हे उन्हाळ्यात सर्वाधिक सेवन केलं जाणारं शीतपेय आहे. मात्र, स्प्राईटच्या हिरव्या बॉटलचा रंग आता बदलला जाणार आहे. आता हिरव्या रंगाची स्प्राईट बाटली पांढरी होणार आहे. कंपनीनं (Coca Cola Company) 60 वर्षांनंतर हिरव्या रंगाची बाटली पांढऱ्या रंगात बदलण्याचा निर्णय घेतलाय.

स्प्राईटची हिरव्या रंगाची बाटली 1 ऑगस्टपासून दिसणार नाहीय. कंपनीनं त्याचा नवा लूकही जारी केलाय. स्प्राईटची निर्माती कोका-कोलानं 60 वर्षांनंतर लोकप्रिय कोल्ड्रिंकच्या जागी पांढरी किंवा पारदर्शक बाटली आणण्याचा निर्णय घेतलाय. पांढऱ्या रंगाची बाटली अधिक टिकाऊ आणि पर्यावरणपूरक असल्याचं कंपनीनं म्हटलंय.

स्प्राईटची मूळ कंपनी कोका-कोलानं सांगितलं की, 1 ऑगस्ट 2022 पासून याबाबतचा नियम लागू होणार आहे. बाटलीचं पॅकेजिंग बदलण्याचा निर्णय घेण्यात आला आहे. आम्ही आमच्या पर्यावरणाप्रती असलेली जबाबदारी पूर्ण करण्यासाठी हा निर्णय घेतलाय. आता आम्ही पांढऱ्या रंगाच्या बाटलीचं रिसायकल करून पुन्हा नवीन बाटली बनवू शकतो. त्यामुळं आम्ही हिरवी बाटली बंद करण्याचा निर्णय घेतलाय, असं कंपनीनं स्पष्ट केलंय. दरम्यान, सर्वप्रथम आम्ही नवीन पांढऱ्या रंगाची बाटली उत्तर अमेरिकेत लाँच करू. त्यानंतर ती हळूहळू भारतासह जगभरातील अनेक देशांमध्ये दिसू लागेल. दरवर्षी बाटल्या तयार करण्यासाठी सुमारे 3 दशलक्ष टन प्लास्टिकचा वापर केला जातो. 2021 सालासाठी कोका-कोलाचा महसूल $ 38.66 अब्ज म्हणजेच, 3 लाख कोटी रुपये होता, असंही कंपनीनं स्पष्ट केलंय.