कोलंबो : दिवाळखोरी आणि वाढत्या महागाईमुळे आर्थिक संकटात (Crises In Sri Lanka) सापडलेल्या श्रीलंकेची परिस्थिती दिवसेंदिवस अधिक बिकट होत चालली आहे. नुकतेच श्रीलंकन सरकारने हार्ड डिफॉल्ट टाळण्यासाठी आगामी काही काळ इतर देशांचे कर्ज फेडू शकणार नसल्याचे जाहीर केले आहे. त्यानंतर आता कोलंबो स्टॉक एक्सचेंज, श्रीलंकेचे मुख्य स्टॉक एक्सचेंजमध्ये 18 एप्रिलपासून पाच दिवस व्यापार होणार नसल्याचे जाहीर करण्यात आले आहे. श्रीलंकेच्या सिक्युरिटी कमिशनने कोलंबो स्टॉक एक्सचेंजला हा आदेश दिला आहे. देशाची आर्थिक परिस्थिती लक्षात घेऊन गुंतवणूकदारांना ही वेळ देण्यात आली असल्याचे यामध्ये स्पष्ट करण्यात आले आहे. (No Trading In Colombo Stock Exchange)

'ब्लूमबर्ग' या वृत्तसंस्थेने दिलेल्या वृत्तानुसार, श्रीलंकेच्या सिक्युरिटीज अँड एक्स्चेंज कमिशनने शनिवारी एक निवेदन जारी करून म्हटले आहे की, "स्टॉक एक्स्चेंजच्या संचालक मंडळाने आणि इतर भागधारकांनी बाजार तात्पुरता बंद करण्यास सांगितले आहे." SEC ने त्यांनी सांगितलेल्या कारणांचा काळजीपूर्वक विचार केला आहे आणि देशातील सद्य परिस्थितीचा शेअर बाजारावर होणाऱ्या परिणामाचे मूल्यांकन केले आहे. त्यानंतर एक्सचेंजने हा निर्णय घेतला असल्याचे निवेदनात म्हटले आहे.

अध्यक्षांच्या राजीनाम्याची मागणी

आर्थिक संकटामुळे श्रीलंकेतही राजकीय संकटाची परिस्थिती निर्माण झाली आहे. राष्ट्राध्यक्ष गोटाबाया राजपक्षे यांच्या राजीनाम्याची मागणी करत लोक रस्त्यावर उतरले आहेत. 81 अब्ज डॉलरची अर्थव्यवस्था असलेल्या या देशावर यावर्षी 8.6 अब्ज डॉलरचे कर्ज आहे. मात्र, सरकारने अलीकडेच सर्व विदेशी कर्जाची भरपाई काही काळासाठी स्थगित केली आहे. अत्यावश्यक वस्तू आणि इंधनाच्या आयातीसाठी परकीय चलन वाचवण्यासाठी सरकारने असा निर्णय घेतला आहे.