तैपेई - अनेक देशांमध्ये कोरोना व्हायरसची दुसरी आणि तिसरी लाट आली आहे. युरोपात काही देशांनी पुन्हा लॉकडाऊन केलं आहे. दरम्यान, जगात असेही काही देश आहेत जिथं कोरोना नियंत्रणात आहे. यातच एक असा देश आहे जिथं गेल्या सहा महिन्यांमध्ये एकही कोरोना रुग्ण आढळलेला नाही. चीनचा शेजारी देश असलेल्या तैवानने कोरोनाला आटोक्यात आणण्यात यश मिळवलं आहे.

चीनमधून जगभर पसरायला सुरुवात झालेल्या कोरोनाने हाहाकार माजवला आहे. असे असताना तैनवानमध्ये गेल्या 200 दिवसात म्हणजेच सहा महिने 20 दिवसांच्या कालावधीत एकही देशातील कोरोनाबाधित सापडलेला नाही. एका बाजुला अमेरिका, युरोप, भारतात कोरोनाचा संसर्ग वेगाने वाढत आहेत. मात्र तैवानमध्ये शेवटचा कोरोनाबाधित 12 एप्रिलला सापडला होता. 

हे वाचा - Lockdown in France : पुन्हा लॉकडाउनचा निर्णय; 700 किमीपर्यंत वाहनांच्या लांबच लांब रांगा!

लोकसंख्येच्या दृष्टीने तैवान हा महाऱाष्ट्राची राजधानी मुंबई इतकाच आहे. तैवानची लोकसंख्या जवळपास 2 कोटी 30 लाख इतकी आहे. याठिकाणी आतापर्यंत फक्त 550 कोरोना रुग्ण सापडले आहेत तर 7 जणांचा कोरोनाने मृत्यू झाला आहे. तज्ज्ञांचे म्हणणे आहे की, सुरुवातीला सीमा बंद केल्याने आणि देशांतर्गत प्रवासावर नजर ठेवल्यानं कोरोनाला रोखण्यात यश आलं. 

कोरोनावर निंयत्रण राखायचं असेल तर कॉन्ट्रॅक्ट ट्रेसिंग महत्त्वाचं आहे. तैवानने याकडे कटाक्षाने लक्ष ठेवलं. तसंच टेक्नॉलॉजीचा वापर करून क्वारंटाइनचा नियम तयार केला होता. सर्वांसाठी मास्क बंधनकारक केला होता. तैवानने कोरोनाच्या आधी सार्सच्या साथीचा सामना केला होता आणि त्यामुळे कोरोनाच्या काळात त्यांनी अधिक काळजी घेतली. 

हे वाचा - आर्मेनियाच्या पंतप्रधानांची पत्नी अझरबैजानशी थेट सीमेवर लढणार; मुलगासुद्धा शस्त्रसज्ज

तैवानमध्ये आतापर्यंत जरी 7 जणांचा मृत्यू झाला असला तरी देशात 3 लाख 40 हजार लोकांना क्वारंटाइन करण्यात आलं होतं. क्वारंटाइनसाठी 14 दिवसांचा कालावधी होता. क्वांरटाइन करण्यात आलेल्यांपैकी एक हजारहून कमी लोकांना नियम तोडला. त्याबद्दल संबंधितांकडून दंडही वसूल करण्यात आला. नियम पाळणाऱ्या लोकांचे प्रमाण हे जवळपास 99.7 टक्के इतकं होतं.