नवी दिल्ली: तालिबानने कंदहार (kandahar) आणि हेरातमधल्या (herat) भारतीय दूतावासावर (indian consulate) छापा मारल्याचे वृत्त आहे. हे दोन्ही दुतावास भारताने सध्या बंद केले आहेत. तालिबानने (Taliban) या दोन्ही दुतावासामध्ये शिरुन कागदपत्र शोधण्याचा प्रयत्न केला. ते या दोन्ही दुतावासात पार्क केलेल्या गाड्या घेऊन निघून गेलेत. कंदहार आणि हेरातमधल्या दुतावासातून तालिबानने काही गोष्टी शोधून काढण्याचा प्रयत्न केल्याची गुप्तचरांची माहिती आहे.

जलालाबाद आणि काबुलमधल्या भारतीय दूतावासाबद्दल काही माहिती मिळालेली नाहीय. दुसऱ्या देशांच्या रिकाम्या दुतावासामध्ये प्रवेश करु नका तसेच तिथे उभ्या असलेल्या गाड्यांना हात लावू नका, असे तालिबानी नेतृत्वाने या आठवड्याच्या सुरुवातीला आपल्या फायटर्सना सांगितले होते. भारतीय दूतावासामध्ये शोध घेण्यात आला, यावरुन तालिबानच्या बोलण्यामध्ये आणि कृतीमध्ये फरक असल्याचे स्पष्ट झाले आहे. अफगाणिस्तानात भारताचे चार दूतावास आहेत. यात कंदहार, हेरात आणि मझार-ए-शरीफचा दूतावास बंद आहे.

अफगाणिस्तानातून नागरिकांची सुटका करण्याची मोहिम सुरु असल्याने समन्वयासाठी काबूलचा दूतावासा सुरु ठेवलाय. अफगाणिस्तानात अडकलेल्या भारतीयांना मायदेशी आणण्याची मोहिम सुरु आहे. मंगळवारी 120 पेक्षा जास्त लोकांना इंडियन एअर फोर्सच्या सी-17 ग्लोबमास्टर विमानाने भारतात आणण्यात आले.