नवी दिल्ली: तालिबानने अफगाणिस्तानवर (Taliban afganistan) वर्चस्व मिळवल्यानंतर भारताबरोबरचा आयात-निर्यातीचा व्यापार (import-export trade) बंद केला आहे. तालिबानने रविवारी काबूलमध्ये (kabul) प्रवेश केला. त्यानंतर तिथली समीकरण बदलून गेली आहेत. तालिबानने सध्या पाकिस्तानमार्गे होणारी मालवाहतूक (cargo) बंद केली आहे. त्यामुळे अफगाणिस्तानातून माल येणं बंद झालं आहे, असं फेडरेशन ऑफ इंडियन एक्सपोर्ट ऑर्गनायझेशनचे महासंचालक अजय सहाय यांनी सांगितले.

"अफगाणिस्तानातील घडामोडींवर आमचे बारीक लक्ष आहे. तिथून पाकिस्तानमार्गे सामान आपल्याकडे येते. तालिबानने सध्या पाकिस्तानमार्गे होणारी मालवाहतूक बंद केली आहे. त्यामुळे आयात थांबली आहे" असे सहाय यांनी सांगितले. "खरंतर अफगाणिस्तानचे आपण सर्वात मोठे भागीदार आहोत.

वर्ष २०२१ मध्ये आपण अफगाणिस्तानला ८० कोटी डॉलर्सपेक्षा जास्त मालाची निर्यात केली. तिथून ५० कोटी पेक्षा जास्त मालाची आयात केली. व्यापाराशिवाय तिथे आपली मोठी गुंतवणूक आहे. अफगाणिस्तान आपण ३ अब्ज डॉलर्सची गुंतवणूक केली आहे. अफगाणिस्तानात आपले ४०० प्रकल्प आहेत. त्यातले काही प्रकल्प सध्या सुरु आहेत" असे सहाय यांनी सांगितले.

व्यापारामध्ये भारताचे अफगाणिस्तान बरोबर चांगले संबंध आहेत. सध्या भारताकडून अफगाणिस्तानला साखर, औषध, चहा, कॉफी, कपडे, मसाले आणि ट्रान्समिशन टॉवरची निर्यात होते. तिथून ड्राय फ्रुटस, कांदा आणि गमची आपण आयात करतो अशी माहिती FIEO च्या महासंचालकांनी दिली.