प्रेषित मोहम्मद (Prophet Muhammad) यांच्याबद्दल केलेल्या वक्तव्यावर आक्षेप घेणाऱ्या देशांमध्ये अमेरिकाही (America) सामील झालीय. गुरुवारी अमेरिकेनं भारतीय जनता पक्षाच्या (BJP) दोन अधिकाऱ्यांच्या वक्तव्याचा निषेध केलाय. त्याचबरोबर अमेरिकेनं याप्रकरणी भाजपच्या कारवाईचंही कौतुक केलंय. विशेष म्हणजे, याआधी अनेक अरब देशांनी पैगंबरांबद्दल केलेल्या वादग्रस्त वक्तव्याचा निषेध नोंदवलाय.

यूएस स्टेट डिपार्टमेंटचे (US State Department) प्रवक्ते नेड प्राइस (Ned Price) म्हणाले, "भाजपच्या दोन पदाधिकाऱ्यांनी केलेल्या आक्षेपार्ह टिप्पण्यांचा आम्ही निषेध करतो. पक्षानं त्या विधानांचा जाहीर निषेध केल्याचं पाहून आम्हाला आनंद होत आहे. आम्ही नियमितपणे भारत सरकारशी मानवी हक्कांच्या मुद्द्यांवर चर्चा करत असतो. भारताला मानवाधिकारांबद्दलचा आदर वाढवण्यासाठी आम्ही प्रोत्साहित करत असतो."

काय होतं प्रकरण

भाजपच्या माजी प्रवक्त्या नुपूर शर्मा (Nupur Sharma) यांनी 26 मे रोजी प्रेषित मोहम्मद यांच्यावर टिप्पणी केली होती. अनेक इस्लामिक देशांनी यावर नाराजी व्यक्त केली. यामध्ये अनेक देश होते, ज्यांचे भारताशी संबंध जवळचे मानले जातात. अमेरिकेपूर्वी कतार, इराण, इराक, कुवेत, सौदी अरेबिया, पाकिस्तानसह अनेक इस्लामिक देशांनी पैगंबरावरील वक्तव्यावर नाराजी व्यक्त केलीय. सध्या शर्माला भारतातही पोलिस कारवाईला सामोरं जावं लागतंय. त्यांच्यावर अनेक एफआयआर दाखल करण्यात आले आहेत.