पाकिस्तान गेल्या काही दिवसांपासून भीषण दंगली सुरू आहेत. येथील दोन समाज हे एका जमीनीच्या तुकड्यासाठी आपापसात भिडले असून पाकिस्तानच्या खैबर पख्तुन्ख्वा प्रांतात सुरू असलेल्या या दंगलीत आतापर्यंत ४९ जणांचा मृत्यू झाला आहे. तर २०० हून अधिक जण जखमी झाले आहेत. पण नेमकं हा वाद काय आहे? याबद्दल आपण जाणून घेणार आहोत.

या दंगलीत या टोळ्यांकडून कमी पल्ल्याच्या क्षेपणास्त्रे, मोर्टार, रॉकेट आणि ऑटोमॅटीक गनही वापरल्या जात आहेत. स्थानिक पोलिसांनी सांगितले की, पाच दिवसांपूर्वी जमिनीच्या वादावरून दोन जमातींमध्ये हिंसाचार सुरू झाला. पीवर, टांगी, बालिशखेल, खार कलाय, मकबल, कुंज अलीझई, पारा चमकनी आणि करमनसह अनेक भागात दंगल पसरली होती.

हिंसाचाराचे कारण काय?

पाकिस्तानात सुरू असलेल्या हिसांचारामागील कारण हे एक जमीनीचा तुकडा असल्याचे सांगितले जात आहे. मागच्या वर्षी जुलै महिन्यात देखील याच जमीनीवरून वाद झाला होता यामध्ये सहा लोकांचा मृत्यू झाला होता. स्थानिक अधिकाऱ्यांनी दिलेल्या माहितीनुसार खैबर पख्तुन्ख्वा प्रांतातील कुर्रम जिल्ह्यात दोन टोळ्यांमध्ये संघर्ष पेटला आहे. या हिंसाचारात ४९ लोक मारले गेले आहेत तर २०० हून अधिक जखमी झाले आहेत. तसेच जिल्ह्यात अनेक ठिकाणी गोळीबाराच्या घटना सुरूच आहेत.

अनेक वर्षांपासून सुरू आहे वाद

अफगाणिस्तान सीमेलगत असलेल्या खैबर पख्तुन्ख्वा प्रांतात या दोन टोळ्यांत संघर्ष सुरू आहे. या भागाला आदिवासी आणि धार्मिक गटांत हिंसाचाराचा इतिहास असून जातीय दंगलीबरोबरच दहशतवादी हल्ले देखील झाले आहेत. तालिबानने देखील या भागाला नेहमीच लक्ष्य केले आहे. चार दिवसांपूर्वी जमिनीवरून वादावरून दोन समुदायात हिंसाचार सुरू झाला. या हिंसाचाराचे लोण देशातील इतर भागांमध्ये देखील पसरले आहे.

हा वाद ३० एकर जमीनीसाठी सुरु असून गुलाब मिल्ली खेल आणि मिदगी कुल्ले या दोन टोळ्यांमध्ये सुरू आहे. गुलाब मिल्ली खेल यांचा संबंध शिया समुदायाशी असून मिदगी कुल्ले सुन्नींशी संबंधीत आहेत. या वादात अनेक वेळा सशस्त्र चकमकी देखील झाल्या आहेत. हे प्रकरण आणखी पेटले आहे.

सतत गोळीबार सुरू असल्याने सध्या या परिसरातील सर्व शैक्षणिक संस्था आणि बाजार बंद करण्यात आले आहेत. तर मुख्य रस्त्यांवरील वाहतूक देखील बंद आहे. परिसरात सुरक्षा यंत्रणा आणि पोलिस देखील तैनात करण्यात आले आहेत.