व्हिएन्ना- ऑस्ट्रियाची राजधानी व्हिएन्ना सोमवारी दहशतवाद्यांच्या हल्ल्याने हादरुन गेली. सोमवारी सायंकाळी लॉकडाऊन सुरु होण्यापूर्वी बाहेर फिरत असलेल्या नागरिकांवर दहशतवाद्यांनी बेछुट गोळीबार केला. या हल्ल्यामुळे मुंबईवर 2008 मध्ये झालेल्या दहशतवादी हल्ल्याची आठवण झाली. व्हिएन्ना येथेही दहशतवाद्यांनी सार्वजनिक स्थळांना लक्ष्य करत अंदाधुंद गोळीबार केला. या हल्ल्यात एक हल्लेखोर आणि किमान 7 जण ठार तर 15 जण गंभीर जखमी झाले आहेत. 

रस्त्याच्या बाहेर बसलेल्या एका व्यक्तीवर गोळ्या झाडण्यात आल्या. आमच्या इमारतीबाहेर किमान 100 गोळ्या झाडण्यात आल्या. लॉकडाऊन सुरु होण्यापूर्वी परिसरातील सर्वच बारच्या बाहेर टेबल लावण्यात आले होते, असे प्रत्यक्षदर्शी रब्बी स्क्लोमो होफमिस्टर यांनी सांगितलं. पुढील एक महिना बार-रेस्तराँ एक महिन्यासाठी बंद होणार असल्यामुळे लोक मोठ्याप्रमाणात बाहेर आले होते. 

हा दहशतवादी हल्ला वाटतो, असे गृहमंत्री कार्ल नेहम्मर यांनी सरकारी वृत्तसंस्था ओआरएफला सांगितले. हा एक दहशतवादी हल्ला वाटतो. हे हल्लेखोर शस्त्रास्त्रांनी सज्ज होते. लष्कराने शहरातील महत्त्वाच्या स्थळांच्या सुरक्षेची जबाबदारी घेतली आहे. पोलिस हल्लेखोरांचा माग घेत आहेत. 

हेही वाचा- ऑस्ट्रियाची राजधानी व्हिएन्ना येथे दहशतवादी हल्ला, 7 जण ठार

ऑस्ट्रियाचे चान्सलर सेबेस्टियन कुर्ज यांनी हा अत्यंत घृणास्पद हल्ला असल्याचे म्हटले आहे. हल्लेखोरांनी विविध ठिकाणी अंधाधुंद गोळीबार केला. यात अनेकजण जखमी झाले आहेत. यामध्ये एका पोलिसाचाही समावेश आहे. व्हिएन्ना पोलिसांनी टि्वट करुन एका संशयित हल्लेखोराचा खात्मा केल्याचे सांगितले.