जपानचे माजी पंतप्रधान शिंजो आबे यांची काल गोळ्या घालून हत्या करण्यात आली. रस्त्यावर उभं राहून भाषण करत असताना आबे यांच्यावर हा हल्ला झाला. पोलिसांनी या हल्लेखोरालाही ताब्यात घेतलं आहे. या हल्लेखोराबद्दल आता अधिक माहिती समोर येत आहे. (Shinzo Abe Murder News)

शिंजो आबे (Shinzo Abe) यांच्यावर झालेल्या हल्ल्याची चौकशी NPA या तपास यंत्रणेकडे सोपवण्यात आली आहे. जपानच्या गृहमंत्रालयाने (Japan Home Ministry) रात्री उशिरा याबद्दलचे आदेश दिले आहे. शिंजो आबे यांची हत्या करणारा व्यक्ती आता पोलिसांच्या ताब्यात आहे. हा व्यक्ती ४२ वर्षांच्या असून यामागामी तेत्सुया असं त्याचं नाव आहे. त्यानं नुकताच आपल्या नोकरीचा राजीमाना दिला आहे. आपण थकलो असल्याचं कारण देत त्याने नोकरी सोडली आहे.

आरोपी यामागामी तेत्सुयाने २० व्या वर्षी नौदलात नोकरी करण्यास सुरूवात केली होती. निशस्त्र दलात तो काम करत होता. २००५ साली त्याने नोकरी सोडली होती. तो नारा शहरामध्येच राहत होता. त्याच्या परिवाराबद्दल कोणतीही माहिती हाती आलेली नाही. त्याने काही काळानंतर एका फॅक्टरीतही काम करण्यास सुरुवात केली होती. मात्र थोड्या दिवसात थकल्याचं कारण देत त्याने नोकरी सोडली होती.

या कंपनीच्या मॅनेजरने जपानमधल्या माध्यमांना दिलेल्या माहितीनुसार, या व्यक्तीला राजकारणात रस होता किंवा त्याला कोणता नेता आवडतो किंवा आवडत नाही, असं काही वाटत नव्हतं. आम्ही तर कधी त्याला राजकारणाविषयी चर्चा करतानाही ऐकलं, पाहिलं नव्हतं. आपण भविष्यात काय करु हेही त्याला माहित नव्हतं.