गोव्याच्या निवडणुकीत (GoaAssembly Elections 2022) भाजपसाठी (BJP) एक मोठं आव्हान निर्माण झालं आहे. गोव्याचे माजी मुख्यमंत्री आणि ज्येष्ठ नेते मनोहर पर्रीकर यांचे पुत्र उत्पल पर्रीकर (Utpal Parrikar) यांना भाजपने डावलल्याने, हा मुद्दा देशभरात चर्चेचा विषय ठरला होता. उत्पल पर्रीकर यांनी उमेदवारी अर्ज दाखल केल्यास सेना (Shivsena) उमेदवार देणार नाही असं संजय राऊत यांनी स्पष्ट केलं होतं. त्यानंतर उत्पल पर्रीकर यांचा उमेदवारी अर्ज वैध ठरताच सेनेनं आपला शब्द पाळत सेनेचा उमेदवार मागे घेतला आहे.

पाच राज्यांच्या विधानसभा निवडणुका तोंडावर येऊन ठेपल्या आहेत. केंद्रात सत्तेत असलेल्या भाजपने या निवडणुकांसाठी जोरदार तयारी सुरू केली आहे. उत्तर प्रदेश आणि गोव्याच्या निवडणुकीत शिवसेनेनं देखील उडी घेतली आहे. गोव्यात उत्पल पर्रीकर यांच्याविरोधात आपण निवडणूक लढवणार नाही असा शब्द सेनेनं दिला होता. तो शब्द आम्ही पाळला असल्याचं संजय राऊत म्हणाले आहेत. उत्प पर्रीकर यांचा अर्ज वैध ठरताच शैलेंद्र वेलिंगकर यांनी पणजीमधून माघार घेतली आहे. या निवडणुकीत आम्ही उत्पल पर्रीकर यांना समर्थन देणार असल्याचं त्यांनी सांगितलं होतं.

शिवसेनेनं घेतलेला हा निर्णय गोव्याचं राजकारण सुधारण्यासाठी असल्याचं संजय राऊत यांनी या ट्विटमध्ये म्हटलं आहे.