नागपूर : कोरोनाच्या तिसऱ्या संभाव्य लाटेत लहान मुले जोखमीच्या गटात राहतील, असे भाकीत तज्ज्ञांनी मांडले आहे. यामुळे लहान मुलांना कोरोना विषाणूपासून दूर ठेवण्यासाठी पालकांनी काळजी घेणे गरजेचे झाले आहे. पालकांनी लहान मुलांसोबत अधिकाधिक वेळ घालवावा. मुलं घरी आहेत, त्यामुळे त्यांच्यावर सारखं रागावून चालणार नाही. काहीही खाण्यापूर्वी हात स्वच्छ धुण्याची मुलांना सवय लावा. सार्वजनिक कार्यक्रमात मुलांना घेऊन जाऊ नका. दोन वर्षांच्या वरच्या वयोगटातील मुलांनी मास्क वापरावे. सॅनिटायझरचा व सोशल डिस्टन्सिंगचा अवलंब करा, असे नवजात शिशूरोग तज्ज्ञ डॉ. प्रवीण खापेकर म्हणाले.

दर दिवसाला कोरोनाबाधितांची संख्या वाढत असल्याने महाराष्ट्रातील अनेक जिल्हे तिसऱ्या लाटेच्या उंबरठ्यावर आले. तिसऱ्या लाटेत कोणताही जिल्हा कोरोनाचा हॉटस्पॉट ठरू नये यासाठी मास्क वापरण्यापासून तर सॅनिटायझर व गर्दीची ठिकाणे टाळणे हे खबरदारीचे उपाय सुरू ठेवण्याची खरी गरज पुन्हा एकदा निर्माण झाली आहे.

निष्काळजीपणामुळे कोरोनाची दुसरी लाट थोपवणे आवाक्याबाहेर झाले. यामुळेच मोठ्या प्रमाणात जीवहानी झाली. लसीकरणाचे दोन्ही डोस घेतल्यानंतरही कोरोना हातपाय पसरत आहे. त्यात लहान मुलांचे लसीकरण अद्याप सुरू झालेले नाही. यामुळे ही लाट मुलांसाठी घातक ठरू शकते. परराज्यातून तसेच राज्याच्या इतर जिल्ह्यातून येणाऱ्यांवर अंकुश लावण्याची गरज आहे. शहरात येणाऱ्यांचे वाढते लोंढे कोरोना वाढीसाठी कारणीभूत ठरण्याची शक्यता आहे.

नियंत्रणासाठी उपाययोजना

• इतर जिल्ह्यातून येणाऱ्यांची सीमेवर व्हावी तपासणी

• महापालिकेने शक्य झाल्यास घरोघरी सर्वेक्षण करावे

• औषध दुकानदारांकडून पॅरासिटेमाल, कफ सिरफ औषधे खरेदी करणाऱ्यांची माहिती महापालिकेपर्यंत पोहोचावी