सध्या खूप थंडी आहे. त्यामुळे लोकांना सर्दी-खोकला- ताप अशी लक्षणं मोठ्या प्रमाणावर दिसत आहेत. अनेक लोकांचा घसा खवखवतोय(Throat Infecction). त्यामुळे अनेकांच्या आरोग्यावर (Health) त्याचा परिणाम होत असून लोकं आजारी पडण्याचं प्रमाण वाढत आहे. जास्त थंडी आणि आंबट पदार्थ खाल्याने तुमचा घसा खवखवू (Sore Throat) शकतो. घश्यात होणारी खवखव व्हायरसमुळे होऊ शकते. पण काही वेळा जंतूही त्यासाठी कारणीभूत असू शकतात. स्ट्रेप्टोकोकस बॅक्टेरियामुळे घश्यात होणारी खवखव जास्त त्रासदायक असते. अशावेळी तीन घरगुती उपाय करून तुम्ही ही खवखव कमी करू शकता.

हळदीचा चहा

जर घसा खवखवत असेल तर हळद घातलेला चहा प्यायल्याने आराम मिळेल. हळद घश्यातील जळजळ कमी करण्यासाठी मदत करेल. तसेच घशातील खवखव, सूज येणे आणि सर्दी खोकल्याचं प्रमाण कमी करण्यास मदत करेल.

तुळशीचा काढा

आयुर्वेदात तुळस गुणकारी मानली जाते. तुळशीचा चहा किंवा काढा प्यायल्याने रोगप्रतिकारक शक्ती मजबूत होते. त्यामुळे व्हायरल संक्रमण दूर होऊन सर्दी खोकला आणि घसा खवखवण्यापासून आराम मिळेल.

मध

थंडीत गरम चहा पिणे सर्वांना आवडतेच. पण घसा खवखवत असल्यास तुम्ही चहात मध घालून तो पिऊ शकता. मधात असलेल्या पोषक तत्त्वांमुळे तुम्ही व्हायरलपासून वाचता शिवाय खवखव कमी होण्यास मदत होते.