वजन नियंत्रणात राहण्यासाठी अनेकजण चालणं पसंत करतात. तसेच व्यायाम केल्यानेही फायदे होतात. पण सगळ्याच लोकांना व्यायाम (Exercise) जमतोच असं नाही. रोजच्या धावपळीच्या जगात व्यायाम करायला न जमल्याने लोकांचे वजन वाढते आहे. त्यामुळे अनेक लोकं वैतागले आहेत. पण जर तुम्ही १० हजार पावलं चाललात तर तुमचं वजन कमी (Weight Loss) होऊ शकतं. शास्त्रज्ञांच्या मते, दररोज १० हजार पावले चालण्याने (Walk) तुमचा रक्तदाब सामान्य तर राहतोच शिवाय तुमचे वजनही कमी होते. नियमित थकवा येत असेल तर तो कमी होतो. तसेच महिन्याभरात नियमितपणे अशाप्रकारे चालल्याने तुमच्या शरीरात सकारात्मक बदल जाणवू शकतात.

शरीराला होतात ५ फायदे

- बीपी कंट्रोलमध्ये राहते. चालल्यामुळे रक्तदाबाची समस्या कमी होऊ शकते.

- रोज १० हजार पावले चालल्याने वजन कमी होण्यास मदत मिळते.

- चालल्यामुळे पचनक्रिया सुधारते. तसेच पचनाशी संबंधित तक्रारी दूर होतात.

- १० हजार पावलं चालल्याने सांधेदुखीपासून आराम मिळतो.

- अशाप्रकारे चालल्याने तुम्हाला कायम सकारात्मक वाटते. तशी उर्जा तुम्हाला मिळते.

अशाप्रकारे करा टार्गेट पूर्ण

तुम्ही एकाचवेळी असे चालण्यापेक्षा दिवसभरात हे टार्गेट पूर्ण करा. सकाळी लवकर उठून चालायला जमले नाही तरी हरकत नाही. पण तुम्हाला घरातील सामान आणायला जायचे असेल, ऑफिससाठी ट्रेन पकडायची असेल तर यासाठी बाईक किंवा कार वापरण्यापेक्षा चालत जाऊन हे काम पूर्ण करा. पायऱ्या चढायलाही हरकत नाही. जिथे शक्य असेल तिथे दिवसभरात चालत जाण्याचा प्रयत्न करा. एकट्याने चालायचा कंटाळा आला असेल तर गाणी ऐकत किंवा आवडते पॉडकास्ट (Podcast) कार्यक्रम ऐकत तुम्ही चालू शकता.