How To Do Setubandh Sarvangasana: हे शयन स्थितीमधील आसन आहे, सर्वांगासनचा व सेतुबंधासन एकचा व्यवस्थित सराव झाल्यानंतर या आसनाचा सराव सुरू करावा.

असे करावे आसन

- प्रथम पाठीवर झोपावे. प्रथम सर्वांगासनच्या स्थितीमध्ये यावे.

- त्यानंतर हळूहळू एक-एक पाय जमिनीच्या दिशेला घ्यावा. पाय खाली घेताना झटका बसणार नाही याची काळजी घ्यावी.

- पाय खाली घेताना सर्वांगासनातील हाताची पकड थोडी बदलावी म्हणजेच हाताचा अंगठा पाठीकडे व चार बोटे पोटाच्या दिशेला या प्रमाणे कमरेला किंवा पाठीला आधार द्यावा.

- दोन्ही तळपाय जमिनीला टेकवायचा प्रयत्न करावा, डोक्याच्या मागची बाजू, खांदे व कोपरे जमिनीला टेकलेले असावेत.

- छायाचित्रात दाखवल्याप्रमाणे आसनस्थिती घेण्याचा प्रयत्र करावा. हे आसन करताना हनुवटी छातीच्या दिशेला चिकटलेली असावी.

- जेवढा वेळ आसनस्थितीमध्ये स्थिर राहणे शक्य आहे, तेवढा वेळ स्थिर राहावे. श्वसन संथ सुरू ठेवावे.

- आसन सोडताना हळूहळू उलट क्रमाने सोडावे किंवा हाताचा आधार काढून दोन्ही हाताचे तळवे खाली जमिनीवर टेकवावे व पाय गुडघ्यात वाकवून हळूहळू कंबर व पाठ जमिनीला टेकवावी.

लाभ

या स्थितीत छातीचे, पोटाचे व मांडीचे स्नायू ताणले जातात. ज्यांना थायरॉइडचा, अस्थमाचा त्रास आहे, पचनाशी संबंधित तक्रारी, कंबरदुखी, पाठदुखी आहे, त्यांनी या आसनाचा सराव नियमित करावा.

काळजी

मानेचे, पाठीचे दुखणे, व्हर्टिगो असलेल्यांनी योग्य मार्गदर्शनाखाली या आसनाचा सराव करावा.