पोळ्यासाठी होते मोठ्या प्रमाणात वृक्षतोड

Pola 2023 : पिठोरी अमावस्या अर्थात पोळ्याच्या दिवशी पळसाच्या झाडाच्या फांद्या (मेढे) दारात ठेवण्याची प्रथा आहे. आयुर्वेदानुसार बहुगुणी पळसात औषधी गुणधर्म सांगितले आहेत. मात्र, पोळ्यासाठी मोठ्या प्रमाणात पळस वृक्षांची कत्तल केली जाते. ज्यामुळे पर्यावरणाचा ऱ्हास होत आहे. बहुगुणी पळस वृक्षांचे संवर्धन करणे काळाची गरज आहे

विज्ञानयुगातही पोळ्याच्या दिवशी पळस वृक्षाच्या फांद्यांची मोठ्या प्रमाणात कत्तल केली जाते. पळस वृक्षांच्या फांद्या ग्रामीण व शहरी भागातही परंपरेने घरासमोर मेढे म्हणून ठेवल्या जातात. या फांद्या जाळल्याने घरातील किटक नाहीसे होत असल्याचे सांगितले जाते. आयुर्वेदात पळसाची फुलं आणि साल वापरण्याचे फायदे सांगितले आहेत. पळसामध्ये अँटीबॅक्टेरियल पदार्थ, अँटिफंगल आणि अँटीॲलर्जिक गुणधर्म असल्याचे आयुर्वेद तज्ज्ञ डॉ. राहुल राऊत म्हणाले.(Lifestyle)

बहुगुणी पळस

कफ-पित्त दोषात फायदेशीर असलेल्या पळसाच्या पानांमुळे पचन सुधारते. लठ्ठपणा आणि मधुमेहावर पळस फायदेशीर आहे. पळसाच्या बिया बारीक करून कोमट पाण्यासोबत सेवन केल्यास पोटातील जंत मारतात. (Bail Pola)

जुलाब, उलट्या, गॅस आणि पोटदुखीवरही पळसबिया फायदेशीर आहेत. बदलत्या जीवनशैलीमुळे रक्त योग्यप्रकारे डिटॉक्स होत नाही. रक्तात दोष होतो. त्यावेळी खरूज, त्वचा काळवंडते अशावेळी पळसाची साल उकळून त्याचा रस पिणे फायदेशीर आहे. पळसाच्या फुलाचा रस वात दोष काढतो. पळसाची फुले रात्री पाण्यात ठेवून, सकाळी गाळून त्यात मीठ अथवा खडीसाखर मिसळून सेवन केल्यास दम्यावर प्रभावी ठरतात.

- डॉ. राहुल राऊत