जळगाव : जिल्‍ह्‍यातील होलसेल औषध व्यावसायिकाचा विश्वास संपादन करून दोन जणांनी वेळोवेळी औषधी खरेदी करून सुमारे ३ लाख ६७ हजार रूपयांमध्ये फसवणूक केल्याचा प्रकार समोर आला आहे. याबाबत जिल्हापेठ पोलिस ठाण्यात गुन्हा दाखल करण्यात आला आहे.

सुनील रामदास भंगाळे (५४, रा. ओंकारनगर, जळगाव) हे कुटुंबियांसह राहत असून मेडिकल व्यवसाय करून उदरनिर्वाह करतात. भंगाळे डिस्ट्रीब्यूटर नावाने त्यांचे होलसेल औषध विक्रीचे दुकान आहे. जळगावातील जिल्हा न्यायालयाजवळील शाहू महाराज हौऊसिंग सोसायटीत मॅक्स मेडिको हे दुकान चरणसिंग जयसिंग चव्हाण आणि मोहम्मद हानिफ शेख मेहबुब हे दोघे भागीदारीने चालवितात. भंगाळे डिस्ट्रीब्यूटरचे मालक सुनील भंगाळे यांचा विश्वास संपादन करून दोघांनी वेळोवेळी रोखीने व्यवहार केला. त्यानंतर उधारीने औषधी घेण्यास सुरूवात केली. नियमितपण उधारीने घेतलेले औषधांची एकुण ३ लाख ६८ हजार रूपये दोघांकडून येणे बाकी होते. सुनील भंगाळे यांनी उधारीची रक्कम दोघांकडे मागितली असता त्यांनी १५ ऑगस्ट २०२१ ला १ लाख ८८ हजार ६३३ रूपयांची धनादेश दिला. हा धनादेश मात्र, बँकेत वटवला गेला नाही. त्यावर रक्कम नमुद करण्याची मागणी सुनील भंगाळे यांनी चरणसिंग जयसिंग चव्हाण आणि मोहम्मद हानिफ शेख मेहबूब यांच्याकडे केली. दोघांनी भंगाळे यांची वेळ मारून नेली. त्यानंतर पुन्हा पैशांची मागणी केली असता दोघांनी आपण असा कोणता माल तुमच्याकडून घेतलाच नाही असा बनाव केला व रक्कम देण्यास नकार दिला. सुनील भंगाळे यांनी पुन्हा दोघांची भेट घेऊन उधारीच्या पैशांची मागणी केली असता दोघांनी शिविगाळ, दमदाटी करून जीवे ठार मारण्याची धमकी दिली. आपली फसवणूक झाल्याचे लक्षात आल्यानंतर सुनील भंगाळे यांनी मंगळवारी (ता.२८) जिल्हापेठ पोलिस ठाण्यात धाव घेतली. सुनील भंगाळे यांच्या फिर्यादीवरून चरणसिंग जयसिंग चव्हाण आणि मोहम्मद हानिफ शेख मेहबुब यांच्या विरोधात जिल्हापेठ पोलिस ठाण्यात गुन्हा दाखल करण्यात आला आहे. प्रदीप चंदेलकर तपास करीत आहे.