जळगाव : कोरोनामुळे घरातील कर्ता व्यक्ती गेल्याने बेरोजगारी वाढली. ही स्थिती लक्षात घेऊन भरारी फाउंडेशनने विविध कंपन्यांशी बोलून आज घडवून आणलेल्या ‘जॉब ऑन द स्पॉट’ या मेळाव्यात ३६ जणांना रोजगार मिळाला.

भरारी फाउंडेशनतर्फे आज गरजू विद्यार्थ्यांना शैक्षणिक साहित्य देणे, शेतकऱ्यांना बी- बियाणे व खतांचे वाटप करणे यासाठी उपक्रम राबविला. शिवाय काही उद्योजकांना सोबत घेऊन हा रोजगार मेळावाही घेतला. दिवाळीनंतरच्या काळातही अशा गरजू व्यक्तींना भरारी फाऊंडेशन रोजगार उपलब्ध करून देणार आहे. उद्योजकांच्या हस्ते त्यांना तत्काळ नियुक्ती पत्रकाचे वाटप करण्यात आले. या वेळी ५९ कुटुंबातील विद्यार्थ्यांना शैक्षणिक साहित्याचे वाटप करण्यात आले.

बारा विद्यार्थ्यांचे पालकत्व

‘गार्डियन’ संस्थेने कोरोना काळात पालकांचे छत्र हरवलेल्या १२ विद्यार्थ्यांचे उच्च शिक्षणासाठी पालकत्व स्वीकारले आहे. कृषी विभागाच्या वतीने जिल्ह्यात कोरोना काळात कर्ता पुरुष गेलेल्या १५ विधवा महिलांना शेतीसाठी खते व बी- बियाण्यांचे वाटप करण्यात आले.

जिल्हाधिकारी अभिजित राऊत, पोलिस अधीक्षक प्रवीण मुंढे, के. के. कॅन्सचे रजनीकांत कोठारी, जिल्हा कृषी अधीक्षक संभाजी ठाकूर, महिला बालकल्याण अधिकारी विजसिंह परदेशी, स्वरूप लुंकड यांनी मनोगत व्यक्त केले. प्रास्ताविक दीपक परदेशी, सूत्रसंचालन व आभार रामचंद्र पाटील यांनी मानले. या वेळी रवी लढ्ढा, अमर कुकरेजा, नंदू अडवाणी, श्रीराम पाटील, अनिल भोकरे आदी उपस्थित होते.