जळगाव : महिला दिनी सादर झालेल्‍या अर्थसंकल्‍पात राज्‍य शासनाने सर्व महिलांसाठी बसमधून प्रवासात ५० टक्के सवलत जाहीर केली. त्याची अंमजलबजावणी सुरू झाल्‍यानंतर लालपरीमधून प्रवास करण्यासाठी महिला प्रवाशांची गर्दी अधिक आहे.

मागील आठवडाभरात तिप्पट महिला प्रवाशांची संख्या वाढली असून, जिल्ह्यात आतापर्यंत साडेतीन लाख महिला प्रवाशांनी सवलतीत प्रवास केला आहे.

राज्‍य शासनाने यंदाच्या अर्थसंकल्पात ‘महिला सन्मान योजना’ घोषित करून राज्‍य परिवहन महामंडळाच्‍या एसटीमधील प्रवासात महिला व मुलींना तिकिटात ५० टक्के सवलत देण्याचा निर्णय घेतला.

या निर्णयाची प्रत्‍यक्ष अंमलबजावणी १७ मार्चपासून सुरू झाली आहे. त्‍याच दिवसापासून महिला प्रवाशांची ‘एसटी’त गर्दी वाढली आहे. अर्थात आता बसमध्‍ये महिला व ज्‍येष्ठ नागरिकांचीच गर्दी अधिक पाहावयास मिळत आहे.

दिवसगणीक संख्‍या वाढतेय

योजनेची अंमलबजावणी झाल्यानंतर जळगाव विभागातून पहिल्या दिवशी २१ हजार ९६१ महिला प्रवाशांनी प्रवास केला. नंतर प्रत्‍येक दिवशी प्रवाशांची संख्‍या वाढत आहे. दुसऱ्या दिवशी ६७ हजार १०९, तिसऱ्या दिवशी ६३ हजार ३९४, तर २० मार्चला तब्बल ७३ हजार, २१ मार्चला ८१ हजार व २२ मार्चला ७५ हजार महिलांनी ५० टक्के सवलतीचा लाभ घेतला.

वृद्ध, महिलांनीच भरतेय बस

परिवहन महामंडळाच्‍या बसमध्‍ये महिला, ज्‍येष्ठ नागरिक व ७५ वर्षांवरील नागरिकांना मोफत प्रवासाची सवलत आहे. यामुळे महामंडळाच्‍या बसमध्‍ये महिला व मोफत प्रवास असलेल्‍या ७५ वर्षांवरील नागरिकच नजरेस पडत आहेत. निम्‍मे बस महिला प्रवाशांनी भरलेली पाहावयास मिळत आहे.

आगार.........महिला प्रवाशांची संख्‍या.........सवलतीची रक्‍कम

जळगाव.........३२ हजार ६५१..............१० लाख ४१ हजार ५१०

यावल...........४० हजार ५३८...............८ लाख ७३ हजार ८२७

चाळीसगाव.....३० हजार ८३६...............७ लाख १७ हजार २१९

अमळनेर........३९ हजार ८८................८ लाख ३६ हजार ३४९

चोपडा..........३६ हजार ९६७..............१० लाख २९ हजार ६७८

जामनेर..........२९ हजार ३७७...............८ लाख २९ हजार ३५

रावेर............२५ हजार ५१८...............७ लाख ४२ हजार ५५५

मुक्‍ताईनगर.....२७ हजार ४५०...............६ लाख १३ हजार २३०

पाचोरा..........२८ हजार ४९८...............७ लाख २९ हजार ३९६

भुसावळ........२१ हजार ६९३...............५ लाख ६६ हजार ५०२

एरंडोल.........३२ हजार ८५३...............६ लाख ६९ हजार ४२२

एकूण......३ लाख ४५ हजार ४६९..........८६ लाख ४८ हजार ७२३