जळगाव : कबूतर पकडण्यासाठी विहिरीत उतरलेल्या करण ऊर्फ कालू चुडामण भिल (पवार) (२४, रा. शेळगाव, ता. जळगाव) या तरुणाचा पाय घसरून सुमारे दीडशे ते दोनशे फूट विहिरीत पडून बुडाल्याने मृत्यू झाल्याची घटना शनिवारी शेळगाव शिवारात घडली. नशिराबाद पोलीस ठाण्यात अकस्मात मृत्यूची नोंद करण्यात आली आहे.

पाय निसटल्याने तरूण पडला विहिरीत

शेळगाव येथे करण ऊर्फ कालू हा तरूण शनिवारी (ता.९) रोजी दुपारी साडेबाराच्या सुमारास गिरीश सदाशिव पाटील यांच्या शेतातील विहिरीजवळ कबुतर पडण्यासाठी गेला. सोबत भाचा तापीराम दामू भील आणि पुतण्या सम्राट गोरख भिल होते. विहिरीत कबुतरांचे घरटे असल्याने त्यांना पकडण्यासाठी करण विहिरीत उतरत होता. दरम्यान त्याचा पाय निसटल्याने २०० फुट खोल विहिरीतील पाण्यात बुडू लागला.

गावकऱ्यांसह पोलिसांनी घेतली घटनास्थळी धाव

करण विहिरी पडताच पुतण्या सम्राटने घरी जात काका विहिरीत पडल्याची माहिती कुटुंबियांना दिली. त्यानंतर पोलिस पाटील विलास पाटील गावकऱ्यांसह घटनास्थळी धाव घेतली. परंतु तो पर्यंत करणचा मृतदेह गाळात रुतून गेला होता.

दुसऱ्या दिवशी काढला मृतदेह बाहेर

घटनेची माहिती मिळताच नशिराबादचे पोलिस कर्मचारी यांनी धाव घेतली. विहिरीत प्रचंड गाळ असल्याने सायंकाळपर्यंत मृतदेह सापडला नाही. रविवारी गावकऱ्यांच्या मदतीने दुपारी बाराला मृतदेह बाहेर काढण्यात आला. उपनिरीक्षक राजेंद्र साळुंखे, राजेंद्र ठाकरे तपास करीत आहे.