चाळीसगाव (जि. जळगाव) : तालुक्यातील एका गावात राहणाऱ्या अल्पवयीन मुलीवर झालेल्या अत्याचारातून ती गर्भवती झाल्याची धक्कादायक घटना समोर आली आहे. या घटनेप्रकरणी चाळीसगाव ग्रामीण पोलिसांत गुन्हा दाखल करण्यात आला आहे.

सविस्तर वृत्त असे की, चाळीसगाव तालुक्यातील एका गावात राहणाऱ्या १६ वर्षीय अल्पवयीन मुलीला एकाने लग्नाचे आमिष दाखवून फुस लावून पळवून नेले. तब्बल साडे सहा महिने शारीरिक संबंध ठेवत तिच्यावर अत्याचार केला. यातून ती मुलगी गर्भवती झाल्याचे गंभीर प्रकार २१ मे रोजी सकाळी १० वाजताच्या सुमारास उघडकीला आला आहे. भगवान उर्फ (भगा) कैलास सोनवणे (रा. चांभार्डी बु. (मजरे) ता. चाळीसगाव जि. जळगाव) असे संशयित आरोपीचे नाव आहे. दरम्यान पिडीत मुलीच्या फिर्यादीवरून चाळीसगाव ग्रामीण पोलिस स्थानकात भादवी कलम- ३७६ (२) (एन), ३६३, ३६६ (ए), पोस्को अंतर्गत ४, ६, ८, १२ अशा विविध कलमान्वये गुन्हा दाखल करण्यात आला आहे. पोलिस निरीक्षक संजय ठेंगे यांच्या निर्देशानुसार पुढील तपास सपोनि धरमसिंग सुंदरडे हे करीत आहे.