जळगाव : बिस्कीट पुड्याचे आमीष देत चार वर्षीय चिमुरडीवर अत्याचार करणाऱ्या नरधामाविरूद्ध अवघ्या सतरा दिवसात तपास पूर्ण करण्यात येऊन दोषारोप पत्र दाखल करण्यात आले. फास्ट ट्रॅक कोर्ट प्रमाणे खटल्याचे कामकाज ६० दिवसात पूर्ण होत न्या. एस. एन. माने- गाडेकर यांनी आरोपी सावळाराम भानुदास शिंदे (वय २७) यास मरेपर्यंत जन्मठेपेची शिक्षा सुनावली. तसेच पीडितेला मनोधैर्य योजनेंतर्गत तीन लाख, दंडाची निम्मी रक्कम, विक्टिम कॅम्पेनसेशन फंड अंतर्गत दहा लाख रुपयांची मदत देण्याचे आदेश दिलेत.

चाळीसगाव तालुक्यातील चार वर्षीय चिमुरडीला (ता.२७ नोव्हेंबर २०२१) रोजी रात्री नऊ वाजेच्या सुमारास सावळाराम भानुदास शिंदे (वय-२७ वर्ष रा. मानसिंगका कॉलनी, पाचोरा, मुळ गाव लढरे ता. नांदगाव जि.नाशिक) याने बिस्कीटचा पुडा खायला देतो असे सांगुन उचलून नेत अत्याचार केला होता. पिडीत मुलीच्या आईच्या फिर्यादीवरून चाळीसगाव शहर पोलिस ठाण्यात गुन्हा दाखल झाला होता.

चाळीसगाव पेालिस ठाण्याचे सहाय्यक निरीक्षक विशाल टकले यांनी प्राथमिक तपासाला सुरवात केली पोलिस अधीक्षक डॉ.प्रवीण मुंडे यांनी गुन्ह्याचे गांभीर्य ओळखत पुढील तपास उपविभागीय पोलिस अधिकारी कैलास गावंडे यांनी पूर्ण केला. तपासात संशयीतासह पिडीतेचे अंगावरील कपडे, रक्ताचे नमुने, डीएनऐ तसेच शरीरावरील ओरखडे, आदींसह विवीध पुरावे संकलीत करुन त्यांचे शासकिय प्रयोग शाळेतून पृथक्करण अहवाल प्राप्त करुन अवघ्या १७ दिवसात देाषारोप पत्र न्यायालयात सादर केले. खटल्याचे कामकाज विशेष न्यायालयात न्या. श्रीमती एस. एन. माने-गाडेकर यांच्या न्यायालयात सुरू होते.

खटला फास्ट ट्रॅक

विशेष न्यायालयाने हा खटला जलदगतीने चालवून साठ दिवसात सुनावणी पूर्ण करून आज (ता.१६) निकाल दिला. न्यायालयाने आरोपी सावळाराम शिंदे यास आजन्म कारावास व दोन लाख आर्थिक दंडाची शिक्षा सुनावली.

न्यायासाठी झटणाऱ्यांचा सन्मान

गुन्हयाचा तपास पोलिस अधिक्षक डॉ.प्रविण मुंढे, अपर पोलीस अधिक्षक रमेश चोपडे यांच्या मार्गदर्शनात तपास अधिकारी कैलास गावडे, सहायक निरीक्षक विशाल टकले, पोलिस नाईक राकेश पाटील, राहुल सोनवणे, विमल सानप, सबा शेख या पथकाने पूर्ण केला. खटल्याचे कामकाजात निरीक्षक के. के. पाटील यांच्या पथकातील दिलीप सत्रे यांच्यासह जिल्‍हा सरकारी अभियोक्ता ॲड. केतन ढाके अशांचा जिल्हा पोलिस अधीक्षकांनी सत्कार करून अभिनंदन केले.