Jalgaon Accident News : भऊरकडून मेहुणबारे गावाकडे येत असताना जामदा ते भऊर दरम्यान भराडी नाल्याजवळील वळणाच्या पुढे असलेल्या ‘डिव्हायडर’ला दुचाकी धडकून तरुणाचा दुर्देवी मृत्यू झाल्याची घटना शुक्रवारी (ता. ८) दुपारी घडली. अविनाश पिरचंद चव्हाण (वय ३५, रा. नवेगाव, मेहुणबारे) असे मृत तरूणाचे नाव आहे.(Bike rider dies after hitting divider near Bhaur jalgaon accident news)

अविनाश चव्हाण हा तरुण शुक्रवारी (ता. ८) दुपारी आपल्या दुचाकीने (क्रमांक- एम.एच. १९ डीसी ७१५१) जामदा गावाकडून मेहुणबारेकडे येत होता. एरंडोल- येवला रस्त्यावरील भऊर ते जामदा दरम्यान असलेल्या भराडी नाल्याजवळील वळणाच्या पुढे रस्‍त्याच्या डिव्हायडरला त्याच्या दुचाकीची धडक लागली.

त्यात त्याचा जागीच मृत्यू झाला. या अपघाताची माहिती मिळताच मेहुणबारे पोलिसांनी घटनास्थळी धाव घेतली. याबाबत पोलिसांत अपघाताची नोंद करण्यात आली आहे.

दरम्यान, एरंडोल- येवला महामार्गवरील भऊर ते जामदा दरम्यान असलेला वळण रस्ता दिवसेंदिवस धोकादायक ठरत आहे. या वळणावर सहा महिन्यात तीन जणांचा अपघातात मृत्यू झाला आहे. आज येथील अविनाश चव्हाण या तरुणालाही आपले प्राण गमवावे लागले.