जळगाव : गेल्या तीन ते चार दिवसांपासून बेपत्ता असलेल्या शरद मोतीलाल तायडे (वय ५८, रा. हरिविठ्ठलनगर) यांचा मृतदेह शनिवारी (ता. ९) दुपारी नशिराबाद स्मशानभूमीजवळील वाकी नदीपात्रात आढळून आला. याप्रकरणी नशिराबाद पोलिस ठाण्यात अकस्मात मृत्यूची नोंद करण्यात आली आहे. (Latest Marathi News)

शहरातील हरिविठ्ठलनगरात शरद तायडे हे वास्तव्यास असून ते बांभोरी अभियांत्रिकी महाविद्यालयात शिपाई म्हणून नोकरीस होते. ते नाशिक येथे आपल्या मुलाकडे गेले होते, काही दिवस मुलाकडे राहिल्यानंतर ते नाशिकहून जळगावला परत यायला निघाले. परंतु ते जळगावला न पोहचता ते नशिराबाद येथे पोहचले. त्याठिकाणाहून त्यांनी मुलगा भावेशला फोन करून आपण नशिराबाद येथे पोहचल्याचे सांगितले. परंतु दोन दिवसांपासून त्यांच्याशी संपर्क होत नसल्याने तसेच ते घरीदेखील परतले नसल्याने त्यांचा मुलगा भावेशने त्यांचा शोध सुरु केला.

अखेर भावेश तायडे यांनी नशिराबाद पोलिसात वडील हरविल्याची तक्रार दिली. दरम्यान, शनिवारी सकाळच्या सुमारास नदीपात्रालगत असलेल्या विटभट्टीवरील मजुरांना नदीपात्रात मृतदेह तरंगतांना दिसून आला. त्यांनी घटनेची माहिती नशिराबाद पोलिसांना दिली. त्यानुसार पोलिस कर्मचारी विजय अहिरे यांच्यासह तायडे यांच्या नातेवाइकांना घटनास्थळी बोलविण्यात आले.

तायडे यांचे नातेवाईक घटनास्थळी दाखल झाल्यानंतर त्यांनी हा मृतदेह शरद तायडे असल्याची ओळख पटविली. त्यानंतर पंचनामा करून मृतदेह शासकीय वैद्यकीय महाविद्यालयात आणण्यात आला.