Jalgaon Crime News : शेंदुर्णी (ता. जामनेर) येथे शनिवारी (ता. ९) शेतीच्या वादातून मुलाने वडिलांचा खून केल्याची खळबळजनक घटना घडली होती. (Boy arrested from Pachora in case of father murder jalgaon news)

या गुन्ह्यात संशयिताच्या मुलानेच पोलिसांत फिर्याद दिली होती. खुनाचा गुन्हा दाखल झाल्यानंतर संशयिताच्या शोधासाठी पथके रवाना झाली होती. दरम्यान, संशयित कैलास बडगुजर याला शनिवारी (ता. ९) मध्यरात्री अटक करण्यात आली.

शेतकरी नाना बडगुजर (वय ८२) हे शनिवारी सकाळी शेतात कपाशी वेचत असताना मुलगा संशयित कैलास नाना बडगुजर (वय ५६) याने पित्यासोबत वाटणीवरून वाद घालून वडील नाना बडगुजर यांच्या डोक्यात भुसा भरण्याच्या पावड्याने डोक्यात जोरात वार करून त्यांचा खून केला. त्यानंतर संशयित कैलास याने घटनास्थळावरून पळ काढला.

या प्रकरणी शेंदुर्णी दूरक्षेत्रचे पोलिस निरीक्षक दिलीप पाटील, शशिकांत पाटील, पोलिस कर्मचारी प्रशांत विरनारे, शशिकांत पाटील यांनी घटनास्थळी धाव घेतली. घटनास्थळाचा पंचनामा करीत साहित्य ताब्यात घेतले.

दिवसभर संशयित मुलगा कैलास बडगुजर याचा शोध सुरू करून पथके रवाना करण्यात आली होती. पाचोरा येथून घेतले संशयिताला रात्री अटक केली आहे. पोलिस निरीक्षक सचिन सानप यांच्या मार्गदर्शनाखाली पोलिस उपनिरीक्षक दिलीप पाटील तपास करीत आहे.