Jalgaon Bribe Crime: मन्याड धरणातील गाळ शेतामध्ये टाकण्याच्या परवानगीसाठी १३ हजार ३०० रुपयांची लाच मागितल्याप्रकरणी येथील पाटबंधारे उप विभाग कार्यालयातील लिपिकाविरोधात धुळे येथील लाचलुचपत विभागाने गुन्हा दाखल केला आहे. (bribery case was registered against irrigation clerk jalgaon crime news)

तक्रारदार शेतकरी वेहेळगाव (ता. नांदगाव, जि. नाशिक) येथील रहिवासी असून त्यांच्या आजोबांच्या शेतजमिनीत मन्याड धरणातून गाळ टाकण्यासाठी परवानगी मिळावी म्हणून त्यांच्यासह ११ शेतकऱ्यांनी आवश्‍यक त्या कागदपत्रांची पूर्तता करुन येथील पाटबंधारे उपविभाग कार्यालयाच्या उपविभागीय अभियंत्यांकडे अर्ज केला होता.

हा अर्ज केल्यानंतर कार्यालयातील लिपिक तुषार अशोक पाटील (३६) याने तक्रारदाराला फोन करून त्यांच्याकडे १३ हजार ३०० रुपयांची लाच मागितली. मात्र, ही रक्कम तक्रारदाराने लगेचच न दिल्यामुळे तुषार पाटील यांनी त्यांच्याकडे तगादा लावला. त्यामुळे तक्रारदाराने धुळे येथील लाचलुचपत प्रतिबंधक विभागाच्या कार्यालयात दूरध्वनीवरुन माहिती दिली.

त्यावरुन धुळे लाचलुचपत विभागाच्या पथकाने चाळीसगावला जाऊन तक्रारीची पंचासमक्ष पडताळणी केली असता, लिपिक तुषार पाटील याने १३ हजार ३०० रुपयांच्या लाचेची मागणी केल्याचे सफ्ष्ट झाल्याने त्याच्या विरोधात भ्रष्टाचार प्रतिबंध अधिनियम सन १९८८ च्या कलम ७ अन्वये गुन्हा दाखल केला.

ही कारवाई धुळे येथील पोलिस उपअधीक्षक अभिषेक पाटील यांच्या मार्गदर्शनाखाली पोलिस निरीक्षक हेमंत बेंडाळे यांनी सहकारी पोलिस निरीक्षक मंजितसिंग चव्हाण, रूपाली खांडवी, राजन कदम, मुकेश अहिरे, मकरंद पाटील, प्रशांत बागूल, संतोष पावरा, रामदास बारेला, प्रवीण पाटील, प्रवीण मोरे, सुधीर मोरे, जगदिश बडगुजर यांच्या पथकाने केली. दरम्यान, या प्रकरणी पाटबंधारे विभागातील अधिकारींचीही पोलिसांनी चौकशी सुरू केली आहे.