Jalgaon News : शहरातील रिंग रोड अजय कॉलनीत अभियंता तरुणाच्या खोलीतून लॅपटॉप, मोबाईल, घड्याळसह रोकड लांबविले. दुसऱ्या घटनेत खानदेश मिल कॉलनीतील चार्टर्ड अकाऊंट तरुणाच्या खोलीतून दोन मोबाईल चोरून नेले. (Burglary in students rooms in district limits jalgaon crime news)

बुलढाणा जिल्ह्यातील चांडोळा येथील मूळ रहिवासी, अभियंता सौरभ अनिल वाळेकर जळगाव शहरातील अजय कॉलनीत वास्तव्यास आहे. सोमवारी (ता. २९) दुपारी तीन ते सहाच्या दरम्यान सौरभ झोपला असताना, त्‍याच्या खोलीतून लॅपटॉप, मोबाईल, घड्याळ व अडीच हजारांची रोकड, असा एकूण २२ हजार ५०० रुपयांचा मुद्देमाल चोरट्याने चोरून नेला.

सायंकाळी सहाला उठल्यानंतर सौरभला त्याचा खोलीत ठेवलेला मोबाईल, लॅपटॉप, घड्याळ व रोकड दिसली नाही. चोरीची खात्री झाल्यावर सौरभ याने रात्री साडेनऊच्या सुमारास दिलेल्या तक्रारीवरून जिल्हापेठ पोलिस ठाण्यात गुन्हा दाखल झाला आहे. पोलिस नाईक शरीफ शेख तपास करीत आहे.

हेही वाचा : Credit Card फसवणूक....काय घ्याल काळजी?

दुसऱ्या घटनेत कलाभवनाच्या पाठीमागे राहत असलेल्या कौशल सुनील जैन (वय २३) यांच्या खोलीतून रविवारी (ता. २९) मध्यरात्री चोरट्यांनी १४ हजार रुपयांचे दोन मोबाईल चोरून नेले. कौशल जैन याच्या तक्रारीवरून जिल्‍हापेठ पोलिस ठाण्यात गुन्हा दाखल झाला आहे. संदीप पाटील तपास करीत आहे.

विद्यार्थ्यांच्या खोल्या टार्गेटवर

उच्च शिक्षणासाठी जळगाव शहरातील महाविद्यालयांच्या जवळपास असलेल्या खोल्यांमध्ये भाड्याने राहतात. बहुतांश विद्यार्थी शनिवारी व रविवारी गावी निघून जात असल्याने त्यांच्या बंद खोल्या चोरट्यांनी टार्गेट केल्या आहेत.

उकाड्याला त्रासून रात्री खोलीचे दार उघडे करून झोपणाऱ्या विद्यार्थ्यांच्या खोल्यातून मोबाईल, लॅपटॉप आणि महागड्या वस्तू चोरीला जात असल्याचे प्रकार वाढले आहेत.