जळगाव : जळगाव तालुक्यातील मन्यारखेडा येथे मध्यरात्री घरातून चोरट्यांनी लोखंडी कपाट फोडून ६४ हजार रूपयांची रोकड लांबविल्याची घटना घडली. याबाबत नशिराबाद पोलिस ठाण्यात चोरट्यांविरोधात गुन्हा दाखल झाला आहे.

मन्यारखेडा (ता. जळगाव) येथील रामदेव मकरध्वज कुशवा (वय ४३) आपल्या कुटुंबीयांसह वास्तव्याला आहे. मजुरी करून आपला उदरनिर्वाह करतात. ६ जुलै रोजी रात्री साडेअकरा वाजता कुटुंबीयांसह रात्री झोपले. मध्यरात्री त्यांनी घराचा दरवाजा उघडा ठेवला होता. याचा फायदा घेत चोरट्यांनी घरात शिरून घरातील लोखंडी कपाटातून ६४ हजार रूपयांची रोकड लांबविली. हा प्रकार गुरूवारी (ता. ७) सकाळी उघडकीला आला. रामदेव कुशवा यांनी शनिवारी (ता. ९) नशिराबाद पोलिस ठाण्यात धाव घेत तक्रार दिली. त्यांच्या तक्रारीवरून चोरट्यांविरोधात नशिराबाद पोलिस ठाण्यात गुन्हा दाखल झाला आहे. पुढील तपास सहाय्यक फौजदार रवींद्र तायडे करीत आहे.