पिंपळगाव हरेश्‍वर (जि. जळगाव) : महिलेला दुचाकीवर बळजबरी बसवून शेतात नेत तोंडात बोळा कोंबून अमानुष अत्याचार (rape) केल्याचा धक्कादायक प्रकार समोर आला आहे. एवढेच नाही तर नराधमाने अत्याचार केल्याचा व्हिडिओ (Video) देखील बनविला असल्याची तक्रार पीडित महिलेने दिली आहे. याप्रकरणी पिंपळगाव हरेश्वर पोलिस ठाण्यात गुन्हा (Crime) दाखल करण्यात आला आहे. (Case Filed against one for Made video of woman raping and torturing Jalgaon Crime News)

पाचोरा तालुक्यातील एका गावात ४० वर्षीय महिला, तिचा भाऊ व मुलासह वास्तव्याला आहे. ती पाच जूनला रात्री नऊच्या सुमारास घरी एकटी असताना संशयित आबा अंबादास कोळी (रा. घोसला, ता. सोयगाव, जि. औरंगाबाद) याने दुचाकीवर येऊन ‘तुला तुझ्या बहिणीच्या घरी सोडतो’, असे सांगितले. याला नकार दिल्याने शिवीगाळ करून तुझ्या भावासह मुलाला मारून टाकेल, अशी धमकी देत तिला दुचाकीवर बळजबरी बसवून घेऊन गेला.

संशयिताने महिलेस त्याच्या सोयगाव शिवारातील शेतात नेऊन तोंडात कपडाचा बोळा कोंबून तिच्यावर अत्याचार केला. एवढेच नाही तर अत्याचाराचा व्हिडिओ देखील बनविला. त्यानंतर मारहाण करून खिशातील भिलावा दगडाने फोडून त्याचे तेल नको त्या ठिकाणी लावून छळ केला. याप्रकरणी पीडित महिलेच्या फिर्यादीवरून संशयित आरोपी आबा आंबादास कोळी याच्याविरोधात पिंपळगाव हरेश्वर पोलिस ठाण्यात गुन्हा दाखल करण्यात आला आहे. सहाय्यक पोलिस निरीक्षक महेंद्र वाघमारे तपास करीत आहेत.