Jalgaon Crime News : शिरसोली ग्रामपंचायत सदस्य नितीन अर्जुन बुंधे (वय ३४) यांच्यावर चॉपरहल्ला करून ठार मारण्याचा प्रयत्न झाला. (Chopper attack on Gram Panchayat member jalgaon news)

शिरसोली येथील जळगाव रोडवरील हॉटेल प्रशांत येथे शनिवारी (ता. २२) घटना घडल्यानंतरही एमआयडीसी पोलिसांनी दुसरा दिवस उलटून रात्री उशिरा या प्रकरणी जखमीचा जबाब नोंदवून मारहाण-शिवीगाळ केल्याचा गुन्हा दाखल केला.

याप्रकरणी एमआयडीसी पोलिस ठाण्यात रविवारी (ता. २३) रात्री नऊला गुन्हा दाखल करण्यात आला असून, दोन जणांना अटक करण्यात आली. अजय विजू भिल आणि किरण कोळी (दोन्ही रा. शिरसोली, ता. जि. जळगाव) अशी अटकेतील संशयितांची नावे आहेत.

हेही वाचा : संतुलित आहारातून रोखा फॅटी लिव्हरचा आजार

शिरसोली-जळगाव रस्त्यावरील प्रशांत हॉटेलमध्ये शनिवारी रात्री दहाला जेवणाचे बिल देण्यावरून हॉटेलमालकासोबत अजय विजय भिल, किरण कोळी भांडण करत होते. ग्रामपंचायत सदस्य नितीन बुंधे यांनी भांडण सोडविण्यासाठी मध्यस्थी केली असता, त्यांच्यावर अजय भिल आणि किरण कोळी यांनी फोन करून दोघांना बोलावून घेत चौघांनी हॉटेलमालकासह नितीन बुंधे यांना मारहाण केली. एकाने चॉपरने नितीन बुंधे यांच्यावर वार करून गंभीर जखमी केले.

नितीन बुंधे यांच्यावर तीन-चार वार केल्यानंतर हॉटेलमध्ये एकच धावपळ उडून ग्रामस्थांनी मदतीला धाव घेतली. बुंधे यांना जिल्‍हा रुग्णालयात व तेथून खासगी रुग्णालयात उपचारार्थ दाखल करण्यात आले. जखमीचा जबाब नोंदवून घेतल्यावर मारहाण व शिवीगाळ केल्याच्या कलमान्वये गुन्हा दाखल केला. सोशल मीडियासह वृत्तपत्रांमध्ये बातम्या झळकल्यावर दोघा संशयितांना ताब्यात घेत अटक करण्यात आली. सहाय्यक फौजदार जितेंद्र राठोड तपास करत आहेत.